Caballero considera que a Xunta trata de disimular ao convocar en Vigo a reunión de Afundación

O alcalde de Vigo, Abel Caballero, criticou este martes que a Xunta convocara na cidade olívica a reunión constitutiva do padroado da Fundación Galicia Obra Social, Afundación, é un intento de “disimular” e volveu esixir que haxa unha sede única en Vigo.

“O señor Feijóo debe crer que en Vigo somos parvos, débese crer que traendo unha reunionciña da fundación das caixas de aforro xa nos contenta”, remarcou Caballero, que engadiu que se o encontro “lle”parece tan importante -a Feijóo-, poña a sede en Vigo, como corresponde, e faga a primeira reunión do padroado en A Coruña”.

O pasado mes de xullo, o pleno da Corporación Municipal de Vigo aprobara por unanimidade esixir á Xunta que a herdeira da obra social das antigas caixas galegas, a marca comercial das cales é Afundación, teña a súa sede e conserve a súa colección artística na cidade de Vigo.

Tal e como trasladou o rexedor, Caixa Galicia non achega nada ao patrimonio inmobiliario e cultural da fundación, que provén “fundamentalmente” do que tiña Caixanova. En concreto, indicou que un 80 por cento do patrimonio procede da caixa de aforros de Vigo, un 15 por cento da de Ourense e un cinco por cento da de Pontevedra.

“Cero da caixa de aforros de A Coruña, en suma de Caixa Galicia; pero a Xunta puxo a sede en Coruña”, criticou o edil, que indicou que que se convocara a primeira reunión do padroado en Vigo só é un intento de “disimular”. “Segue a tomadura de pelo nunha posición de auténticos caraduras políticos da Xunta con esta cidade”, denunciou.

Finalmente, o mandatario volveu esixir, tal e como fora aprobado no pleno, que Afundación inclúa nos seus estatutos que a súa sede “a todos os efectos” se localiza en Vigo, e que tamén se “blinde” a permanencia na cidade da colección artística da Obra Social de Novacaixagalicia.