Baltar considera que a petición da súa dimisión tras a condena ao seu pai entra no xogo político

José Manuel Baltar

O presidente da Deputación de Ourense e do PP nesta provincia, José Manuel Baltar Blanco, sinalou que “entra no xogo político” que os grupos da oposición pidan a súa dimisión, ao considerar que el é o principal beneficiado polos 104 contratos polos que foi condenado o seu pai e predecesor en ambos cargos, José Luis Baltar Pumar.

A preguntas dos medios de comunicación nun acto, Baltar Blanco ironizou coas peticións de dimisión do PSdeG, o grupo político que denunciou ao seu pai, que foi condenado por prevaricación na contratación de persoal á fronte da Deputación de Ourense no primeiro trimestre de 2010. O congreso da sucesión á fronte do PP ourensano celebrouse no mes de xaneiro dese ano.

Para Baltar Blanco, é “previsible” que pidan a súa dimisión, ao que agregou que “ese é o discurso socialista” e subliñou que nesta ocasión ese partido non pediu un pleno extraordinario. Preguntado se estaba satisfeito con que o fallo xudicial non aludise a el en concreto, limitouse a indicar: “Lin a sentenza e só teño que valorar ese respecto por iso e para nada se estou satisfeito ou non por iso”.