Aberto o prazo de inscrición para o campus do Lugo Sala

A primeira actividade que organizará o club, o seu Campus Específico de Fútbol sala do 3 ao 5 de setembro e que levará a cabo nas instalacións do Complexo Polideportivo O Pombal e os seus arredores, xa conta con toda a súa programación desenvolvida. Esta actividade está dirixida a nenos e nenas nacidos entre os anos 1999 e 2008.

A menos dun mes da celebración do mesmo, a entidade perfilou todas as actividades que levarán a cabo e desta maneira abriuse o prazo de inscrición para os nenos e nenas que desexen gozar desta actividade. Hai que lembrar que para os alumnos inscritos neste momento no club, ou que o fagan antes da data de celebración do Campus, esta actividade será gratuíta, mentres que para os non pertencentes a Lugo Sala terá un custo de 40 €.

O Campus non se centrará só no fútbol sala, senón que ademais prevense a realización de diversas actividades de lecer e tempo libre así como dunha actuación sorpresa no último día do evento onde todos os asistentes gozarán dunha comida de convivencia. A maiores, diariamente asistirán ao Campus xogadores e adestradores profesionais da liga Nacional de Fútbol sala e así mesmo haberá sorteo de agasallos entre todos os nenos participantes. Todos os nenos e nenas participantes no Campus recibirán dúas camisetas oficiais entre outros detalles.

O prazo de inscrición xa se atopa aberto e as prazas son limitadas, polo que se seguirá rigorosa orde de inscrición até alcanzar o máximo de prazas. Os interesados poden entregar as súas inscricións na Tenda Legea Sport (Avenida da Coruña, 72) ou enviala por e-mail a info@lugosala.com antes das 14:00 horas do martes 2 de setembro.