A Consellería de Medio Ambiente asegura que o río Tea está practicamente recuperado

A Consellería de Medio Ambiente, Territorio e Infraestruturas ratificou este mércores que o río Tea (Pontevedra) está “practicamente recuperado” tras a vertedura de sosa cáustica da empresa Augas de Mondariz, e o departamento se atopa á espera dos resultados das mostras.

A preguntas dos xornalistas tras unha rolda de prensa sobre a Rede Natura, a conselleira, Ethel Vázquez, informou de que o PH do río se recuperou e de que está á espera de que o laboratorio da Xunta emita o informe cos resultados para “pensar en actuacións” que melloren a fauna e a flora.

En canto ás medidas que se poidan recoller no expediente sancionador á empresa, a conselleira mostrouse prudente ao afirmar que sacará conclusións “cando teña os resultados”. Así, asegurou que “con toda seguridade” o informe do laboratorio estará dispoñible ao longo desta semana, polo que as accións se porán en marcha “o antes posible”.

A vertedura duns 3.000 quilos de sosa cáustica, procedente da planta de Augas de Mondariz, arrasou con fauna e flora do río Tea na madrugada do pasado venres, e afectou a máis de 2 quilómetros do río.