A Aldea de verán de San Sadurniño despídese cunha festa nos xardíns municipais

Os nenos e nenas que participan na edición deste ano da Aldea de verán apuran os últimos días de actividades antes do remate do programa. Atrás quedan semanas de xogo e aprendizaxe que rematarán este venres cunha festa de despedida nos xardíns municipais. A recta final do verán tamén supón o arranque dunha nova etapa para a proposta socioeducativa Espazos das familias, que abrirá as inscricións o próximo luns 1 de setembro.

Desde o mes de xullo os cativos e cativas da Aldea de verán tiveron tempo para facer de todo. O principal foi xogar, aínda que sempre cunha finalidade educativa. Por iso grande parte das mañás dedicárona a xogos cooperativos, manualidades e unha constante actividade física e mental coa que axudar ao seu desenvolvemento. 

A maior parte do tempo pasárono no patio cuberto do CPI, pero tamén fixeron saídas a outras partes do concello e mesmo foron de excursión ao Centro de Extensión Universitaria e Divulgación Ambiental de Galicia situado en Oleiros. Ademais tamén gozaron de obradoiros sobre reciclaxe e consumo responsable, primeiros auxilios e, o máis recente, sobre seguridade viaria impartido coa colaboración da Policía Local das Pontes.

A despedida da Aldea de verán farase este venres cunha festa na que se reunirán os nenos e nenas das dúas quendas do programa -a de xullo e a de agosto-. Para eles haberá hinchables, escuma, maquillaxe e distintos xogos. Ao remate sortearase unha visita guiada á aula ambiental do Cabalar, situada nas Pontes.

A Aldea de verán contou con apoio da Deputación da Coruña. O Concello quixo prolongar o servizo cun programa complementario denominado Setembro concilia que duraría desde o 1 ao 5 de setembro e para o que ofrecía 12 prazas. Tralo remate do prazo de solicitudes o venres pasado e ao non xuntarse un número mínimo de inscricións -só houbo dúas- desde o departamento de Educación e Igualdade optouse por suspendelo.

Volven os Espazos das familias

Co comezo do mes tamén abre o prazo para inscribirse en Espazos das familias, un programa dirixido a familias con nenos e nenas de 0 a 3 anos que substituiu xa hai tres anos ao desaparecido Preescolar na casa. A actividade busca apoiar as familias na educación dos fillos e fillas ofrecendo un espazo onde os cativos se relacionen con outros cativos, onde pais e nenos compartan xogos e, en definitiva, onde profundar no desenvolvemento dos máis pequenos. 

Espazos das familias céntrase nunha etapa da infancia na que os meniños empezan a descubrir o mundo que os rodea e na que se vai conformando a súa personalidade. Ademais, as sesións tamén perseguen que os pais e nais aprendan todo o que hai que saber sobre o crecemento infantil, sobre a necesidade de que todo o nucleo familiar se implique no labor educativo dos novos membros e, máis que nada, sobre como levar a cabo unha crianza dos nenos e nenas responsable e igualitaria.

As inscricións neste programa poden facerse ata o 16 de setembro no departamento de Servizos Sociais -programa de Educación Familiar- e hai máis información nos teléfonos 981 490 027 e 673 903 922. Unha vez rematado o prazo de inscrición farase unha xuntanza para establecer os horarios e os grupos definitivos. Cómpre bulir porque só se ofrecen 24 prazas que se cubriran por orde de solicitude e con prioridade para as familias empadroadas en San Sadurniño. 

Espazos das familias comezará previsiblemente a primeiros de outubro e, como en anteriores edicións, as sesións terán lugar na casa da Cultura cunha periodicidade quincenal ata finais de maio do ano que vén.