Uns 500 participantes disputarán a “carreira nocturna” máis urbana de Vilagarcía

Preto de cincocentos deportistas xa están inscritos na XI Carreira Nocturna que se celebra este sábado en Vilagarcía e que, con respecto a anteriores edicións, ten un percorrido marcadamente urbano, ao utilizar como recinto varias das rúas peonís. Por esta razón, membros da Fundación de Deportes e de Protección Civil visitaron un por un os locais hostaleiros afectados polo paso da carreira, de xeito que se buscou o mellor acomodo posible para evitar que as terrazas vexan diminuída a súa superficie ordenándoas temporalmente doutro xeito. Igualmente, en cada un dos garaxes púxose un cartel advertindo das restriccións de uso entre as 22,00 e as 23,30 horas.

A petición de moitos dos participantes, o percorrido da proba absoluta presenta lixeiras modificacións respecto doutros anos. Así, a saída, ás 22,30 horas, producirase baixo un arco situado na avenida da Mariña para seguir logo por Rivero de Aguilar e as rúas Comercial e Marsopa para seguir por Valle Inclán, García de Caamaño (trala praza de abastos), Castelao, praza de Galicia, Padre Feijóo, Arapiles, Ravella, Ramón y Cajal, Rey Daviña, Núñez Búa, Méndez Núñez, Valentín Viqueira e de novo avenida da Mariña. A proba consistirá en dar tres voltas a este circuíto.

Os 150 primeiros participantes das categorías A, B, C e D –é dicir, os que naceron en 2002 e posteriores) terán medalla; os 3 primeiros clasificados en cada categoría terán trofeo, ao igual que os 3 mellores deportistas locales masculino e feminina.

Na proba absoluta, os primeiros clasificados masculinos e femininos terán 200 euros de premio; os segundos, 150; os terceiros, 100; os cuartos, 60; e os quintos, 50. Os primeiros clasificados locais, masculino e feminino, recibirán 60€, e os segundos, 50.