Un cambrés recibe o segundo premio na feira de inventos de Valladolid cun proxecto de recarga de baterías con enerxía eólica

O alcalde de Cambre na reunión con Ángel Sánchez

O alcalde de Cambre, Manuel Rivas, recibiu esta mañá a Ángel Sánchez Parga, galardoado co segundo Premio León de Plata na Feria Internacional de Inventos, Inventores e Innovación de Valladolid que tivo lugar o pasado mes de xuño. Sánchez explicou ao alcalde o invento denominado “RECARGA DE BATERÍAS” no que estivo traballado nos últimos meses e que lle fixo merecedor do galardón. Trátase dun sistema de recarga para a batería dun coche eléctrico que utiliza enerxía eólica.

O aparello pode instalarse nas portas dos vehículos ou na parte traseira do coche, de tal forma que cando o automóbil circula, o vento pasa a gran velocidade por un sistema que fai virar a unha turbina que, á súa vez, xera electricidade. Segundo explicou Sánchez, o sistema está xa patentado e non é a única idea innovadora que manexa.

Nestes momentos traballa en dúas patentes que fará públicas nos próximos meses. Rivas felicitou ao inventor cambrés e instoulle a seguir traballando nestes proxectos que, segundo indicou, son ideas que mellorarán a vida das persoas. “Temos que estar orgullosos de persoas como Ángel, que coa súa imaxinación logrou chamar a atención de grandes empresas. Estou seguro que veremos pronto proxectos de I+D+i baseados nestas ideas tan creativas”, apuntou.

A feira que tivo lugar en Valladolid reuniu a decenas de investidores en busca de novos produtos ou ideas, con inventores que buscan empresarios para poder comercializar as súas invencións, combinando as necesidades duns coas ofertas doutros e desta maneira levalas á realidade.