Rueda sostén que Hernández e o seu equipo merecen unha oportunidade para demostrar do que son capaces

O vicepresidente da Xunta e secretario xeral do PPdeG, Alfonso Rueda, remarcou este martes a súa confianza no novo alcalde de Santiago, Agustín Hernández, convencido de que os novos integrantes do goberno local serán capaces de devolver a “normalidade” á Casa do Concello e de que merecen “unha oportunidade” para demostrar “da que son capaces”.

Tras asistir á toma de posesión, Rueda incidiu na promesa de acabar coa “excepcionalidade” formulada por Hernández no seu discurso de investidura, pero tamén no aceno do rexedor á oposición ao pedir a “implicación de todos” para conseguir que o Concello traballe “con normalidade”.

Non en van, o vicepresidente subliñou que Santiago é a capital de Galicia, “unha cidade moi importante”, para engadir que o novo alcalde e o seu equipo merecen “unha oportunidade” para demostrar “do que son capaces”. “Que eu estou seguro de que son capaces de moitas cousas”, dixo.

Sobre a decisión do BNG de abandonar a sesión, sinalou que “o normal sería” que quedase. “A pregunta é: ¿e cál era a alternativa?”, esgrimiu, antes de recordar que “durante moito tempo” a oposición dicía que “había que tomar decisións” e demandaba “actuacións”.

Rueda apuntou que o relevo é unha mostra de que o PPdeG actúa, incidiu en que se inicia unha nova etapa cun novo alcalde e lanzou o Bloque “a pregunta de cál era a súa proposta”. “¿Non querían normalidade, non querían que se traballase?”, preguntouse.

Así, aínda “respectando” o paso dado polos nacionalistas, remarcou que hai actitudes que “non son doadas de entender” e defendeu que o axeitado, dende un punto de vista “construtivo” sería “empurrar cara a diante” polo ben da Casa do concello, aínda defendendo cada un “os seus intereses e o seu papel”.

“AQUÍ HAI UN ACTO DEMOCRÁTICO”

Sobre os dous detidos nas protestas pola toma de posesión de Hernández, replicou que o deste martes é “un acto democrático”, polo que se dispuxo a aceptar calquera manifestación que se realice “por canles democráticas e pacificamente”. “Se non é así, non me parece lóxico e me parece fose de lugar”, contrapuxo.

“O que se estaba a celebrar hoxe aquí é un acto democrático con todas as bendicións legais e de cara a abrir unha nova etapa no Concello; aínda que poida gustar máis ou menos dende o punto de vista político, merece todos os respectos”, defendeu.