Preto de 50.000 escolares participaron no programa Coruña Educa

O concelleiro de Educación, Deportes e Mocidade, Francisco Mourelo, fixo hoxe balance de Coruña Educa, “un proxecto que desde a súa posta en marcha supuxo 19 novos programas educativos e accións para o alumnado de Infantil, Primaria e Secundaria con respecto a 2011, pasando de 13 a 32; unha circunstancia que permitiu que a participación neste programa desde o curso 2011/12 incrementouse en máis dun 60%, superando os 48.000 participantes”, destacou o concelleiro.

Así, Francisco Mourelo detallou algún dos aspectos máis destacables do curso 2013/14:

– Coruña Tardes (Programa de Lecer Educativo, Deporte non Centro e Xogos Escolares. Participaron 3.916 estudantes, de 33 centros educativos, un 65% máis que no curso 2011/12.

– Coruña Saúde (Educa Saúde). Neste curso participaron un total de 4.587 escolares, 1.027 familias, 27 centros e 15 profesionais. “Desde a posta en marcha deste programa pioneiro e único en España contouse coa participación de 10.575 escolares entre 1 e 12 anos e máis de 3.000 familias. A iniciativa, que conta co aval da Asociación Galega de Pediatría e está integrado por un equipo multidisciplinar formado por pediatras, matronas, enfermeiras, psicólogas e un educador social, intervén nos centros en catro ámbitos fundamentais: a prevención, o psicosocial, o médico e o afectivo – sexual. Ademais, un dos aspectos fundamentais do programa é a participación simultánea das familias”, sinalou o concelleiro.

– Coruña Diversidade (O teatro das emocións, para escolares con autismo; Taller de altas capacidades, para escolares con sobredotación intelectual; e Taller para escolares diagnosticados de trastorno por déficit de atención con/sen hiperactividade. Neste curso participaron case 100 escolares de todas as etapas educativas.

– Coruña Linguas (Listen & Speak, Programa Idiomas en Secundaria, Obradoiro de curtametraxe en galego, CinEoi e Certame de Relato Curto en Galego). Participaron un total de 617 alumnos de 36 centros da cidade.

– Coruña Comunica (Radio en Valor e Obradoiro Multimedia de Comunicación). 1322 participantes.

– Coruña de Aventura. Este curso, 23.941 alumnas e alumnas participaron neste programa que inclúe as Rutas Urbanas Animadas, Itinerarios e Visitas.

– Coruña non Mundo (Bolsas USA -46-, Bolsas FP -30- e intercambios -484-).

– Coruña a Escena (Certame de Teatro Escolar, Teatro en Inglés, Monólogos en galego e Concurso escolar de Videopoemas): 1.193 participantes.

– Coruña Tics (Click English e I Concurso Municipal do Blog escolar). 117 participantes, entre escolares e docentes.

– Ademais, durante o curso 2013/14, organizáronse outras accións formativas como o Programa de Autoprotección e Seguridade, Nadal Ecolóxico, Rebumbio e Feira Matemática, Xornadas de Orientación, Programa Madrugadores e representacións teatrais.

“O Coruña Educa é o resultado dun traballo rigoroso no participa activamente toda a comunidade educativa e que situou á cidade como un dos grandes referentes educativos do país”, destacou Mourelo, quen engadiu: “Precisamente é esa implicación a que fai posible que este programa se supere curso tras curso incrementando o seu forte carácter social e integrador”.

Neste sentido, Francisco Mourelo lembrou que no período 2013/14 iniciáronse 6 programas e accións educativas novas: o Taller para escolares con autismo, Teatro en Inglés, o Programa de Autoprotección e Seguridade nos centros educativos, o Certame de poesía e relato curto en galego, o Concurso municipal de blogs e o Concurso escolar de videopoemas. Ademais, tamén se realizou unha profunda renovación das rutas e itinerarios de Coruña de Aventura, dentro do proxecto Smart City; e elaborouse un novo regulamento para as Escolas Infantís Municipais.

“Un dos grandes logros deste curso foi a aprobación do novo regulamento das Escolas Infantís Municipais; un documento máis xusto, ao crear oportunidades reais de igualdade, e máis solidario e realista coa situación familiar e socioeconómica das familias, xa que contempla, por primeira vez, a existencia de prazas totalmente gratuítas en función dos niveis familiares de renda e para segundos e sucesivos irmáns; ten en conta a situación de familias monoparentais, numerosas e con algún tipo de discapacidade; e garante o acceso para menores con necesidades especiais de apoio educativo”, explicou o concelleiro, quen destacou que estes cambios de criterio xa permitiron que 183 alumnos accedan ás Escolas Infantís Municipais o próximo curso. Ademais, cubríronse 14 das 17 prazas gratuítas reservadas para menores en risco de exclusión e 37 menores obtiveron unha praza gratuíta por segundos ou sucesivos irmáns.

“O novo documento é un exemplo máis do forte carácter social do Coruña Educa”, destacou o concelleiro, e engadiu: “As taxas mantéñense conxeladas desde 2012; dos 32 programas ou accións educativas que se ofrecen, máis do 60%, un total de 19, son gratuítas; ademais, o Programa de Lecer Educativo tamén conta cunha porcentaxe de prazas gratuítas e deseñouse especialmente -en horario de 16.00 a 18.00 horas, de luns a venres- para facilitar a conciliación da vida familiar e laboral. Coruña Educa entendeu ademais a relación natural que ten que haber entre educación, saúde e deporte; non se esquece daqueles que teñen necesidades educativas especiais; e premia o esforzo con bolsas no estranxeiro que, por primeira vez e saldando unha débeda histórica, tamén poden gozar os estudantes de FP, ademais dos de Bacharelato. Ademais, tivéronse en conta as achegas de toda a comunidade educativa: escolares, pais e profesores”.

Por último, Francisco Mourelo, lembrou que o programa Coruña Educa xerou no curso 2013/14, 258 postos de traballo, 100 máis que o curso anterior. En total, participaron 48.179 alumnos, fronte aos 34.565 do ano lectivo 2012/13, un 39% máis; incrementouse o número de horas de formación nun 11%, alcanzando un total de 13.151; e 61 entidades sumáronse ao proxecto, alcanzando a cifra de 76 colaboradores, un 24,6% máis.