O túnel do viño Rías Baixas abre as súas portas até o domingo

O salón de Congresos e Exposicións José Pena de Cambados abría esta mañá as súas portas para acoller até o domingo a cuarta edición do Túnel do Viño e Catas Temáticas D.O. Rías Baixas. O secretario xeral do Medio Rural e Montes, Tomás Fernández-Couto, acompañado polo delegado territorial da Xunta en Pontevedra, José Manuel Cores Tourís, o presidente e o secretario xeral do CRDO Rías Baixas, Juan Gil de Araujo e Ramón Huidobro e o alcalde de Cambados, Luís Arangude foron os encargados de inaugurar oficialmente esta nova edición do Túnel do Viño que ofrece a posibilidade de degustar un total de 126 marcas pertencentes a 56 adegas desta denominación de orixe.

Todos eles coincidiron en destacar o gran ambiente que houbo no Túnel desde a apertura de portas, o que augura que esta edición será, de novo, un gran éxito. De feito, nas catro edicións nas que se celebrou este túnel, esta é a que conta cun maior número de marcas. O presidente do Consello Regulador da Denominación de Orixe Rías Baixas, Juan Gil de Araujo, fixo fincapé en que se trata dunha oportunidade única para probar viños de diferentes subzonas e elaboracións, nun ambiente idóneo e co asesoramento dun catador como Nacho Costoya.

Esta mañá tamén tiveron lugar as dúas primeiras Catas Temáticas, centradas en dúas adegas da D.O. Rías Baixas, o que permite ao consumidor final achegarse mellor aos viños elaborados pola adega, coñecendo ao elaborador e a historia que hai detrás de cada botella. Cabe lembrar que, tanto o Túnel do Viño como as Catas Temáticas continuarán até o domingo. O horario de apertura é de 11:00 a 13:30 horas e de 18:00 a 20:30 horas, coa excepción do domingo no que só abrirá en horario de mañá.

O custo da entrada é de 15 euros, prezo que inclúe unha sesión de cata de dúas horas e o agasallo dun catavinos co logotipo conmemorativo do 25 aniversario da Denominación de Orixe Rías Baixas. As entradas poden adquirirse directamente no Salón José Pena de Cambados.