O presidente da Deputación da luz verde á rehabilitación do Calvario de Coiro

O presidente da Deputación Provincial, Rafael Louzán, e o alcalde de Cangas, José Enrique Sotelo, rubricaron o convenio no que se formaliza a restauración do Calvario de Coiro localizado nas proximidades da Casa Reitoral. A protección do patrimonio histórico-artístico de Cangas é un dos obxectivos fixados polo actual goberno para a conservación da escultura popular.    

O Calvario de Coiro composto por 3 cruces rectangulares de diferentes tamaños, sen imaxes, representativas da crucifixión de Cristo están na actualidade en pésimas condicións de conservación a causa de diferentes factores, tanto climatolóxicos como humanos.

A sinatura deste Convenio permitirá a restauración por parte do Servizo da Escola de Canteiros da Deputación Provincial das 3 cruces sinxelas localizadas no entorno da Reitoral de Coiro. Os traballos de restauración levaranse a cabo nos talleres da Escola de Canteiros para o que se precisará o seu traslado. Os traballos consistirán na extracción dos ferros, consolidación daquelas roturas de pequeno tamaño, confección das pezas que se atopen en mal estado, ensamblaxe do fuste central, ademais todas as pezas se limparán de líquenes, algas, musgos, etc.                                                                      

O prazo de execución estímase en menos de 5 meses e o prezo total da obra ascenderá aos 4.416,50 euros.