O Igape promove a incorporación de investidores coruñeses á rede galega de business angels para financiar proxectos emprendedores

Os directores do Igape, Javier Aguilera, e de Xesgalicia, Juan Cividanes, mantiveron esta mañá na Coruña unha xuntanza de traballo con máis de vinte investidores particulares para animalos a integrarse na futura Rede Galega de Investidores contemplada na Lei do emprendemento como instrumento para reforzar o financiamento de novos proxectos.

Durante a xuntanza, Aguilera e Cividanes destacaron a importancia de procurar a converxencia de fondos privados e públicos, para facilitar as decisións de investimento e para tratar de que os proxectos emprendedores viables teñan máis facilidades para acceder, de modo áxil, aos instrumentos de financiamento máis adecuados ás súas demandas.

Entre os distintos instrumentos de apoio habilitados pola Consellería de Economía e Industria para facilitar os investimentos promovidos por novos emprendedores dentro do programa Galicia 1000, Javier Aguilera referiuse aos préstamos directos Jeremie, a partir de 70.000 euros; aos microcréditos de ata 25.000 euros, con xuros que poden acadar bonificacións de ata 4 puntos; e aos préstamos comprendidos entre 25.000 e 1 millón de euros, tamén bonificados.

Pola súa banda, o director de Xesgalicia recordou que está tamén dispoñible o fondo de capital risco Galicia Emprende, preparado para financiar ou cofinanciar, conxuntamente cos investidores particulares integrados na futura rede galega, novos proxectos de emprendedores con investimentos comprendidos desde 35.000 ata 500.000 euros.