O Foro Cívico Empresarial pide ao novo rexedor compostelán a defensa dunha intermodal e do aeroporto de Santiago

Rolda de prensa do Foro Cívico Empresarial

O Foro Cívico Empresarial reclama ao futuro alcalde de Santiago de Compostela, Agustín Hernández, que este martes tomará posesión do seu cargo, que “lidere” a defensa dos intereses da capital galega, entre os que fixa levar a cabo o proxecto dunha estación intermodal e o impulso do aeroporto fronte aos de Vigo e A Coruña.

Así, nunha rolda de prensa ofrecida este luns, esta asociación manifestou a súa preocupación despois de que Agustín Hernández suxerise en días pasados, en declaracións a “La Voz de Galicia’, que aposta por “reformar a actual estación de ferrocarril”, aparcando das prioridades o proxecto de integración dos transportes.

En canto á política aeroportuaria, na que ata agora cumpría un papel de intermediación entre as tres cidades con terminais, o Foro Cívico sinala que, aínda que o rexedor “non ten un papel decisivo” neste ámbito, remarcou que “si ten que liderar os intereses da cidade de Santiago”.

O voceiro desta entidade, Carlos García Cumplido, remarcou que o aeroporto “segue sendo unha preocupación” e, polo tanto, “hai que facer viable” a terminal.

Neste sentido, recordou que Galicia ten un aeroporto “internacional”, que é o de Lavacolla, e o cal “ten que utilizarse con máis intensidade”.

Así as cousas, defendeu que “Galicia non pode ter tres aeroportos” por razóns económicas” e apostou por que “hai que organizar o mapa aeroportuario e, se sobra algún, haberá que pechalo”.

INTERMODAL

De novo sobre a intermodal, os diferentes representantes de institucións, asociacións e colexios profesionais da cidade aglutinados no Foro Cívico defenderon como “imprescindible” esa infraestrutura, a cal agruparía os servizos de tren e autobús no mesmo lugar, e estaría situada na actual estación de ferrocarril que acollerá a chegada do AVE.

Segundo o Foro Cívico, a estación de tren queda pequena e non cumpre coas normas de accesibilidade e seguridade”. A de Santiago é a que máis pasaxeiros move en Galicia, tal e como se desprende dos datos Renfe, cun total de 1.771.974 pasaxeiros.

Ademais, García Cumplido agregou que “Santiago é o escaparate de Galicia e necesita outro tipo de estación”.

O Foro Cívico Empresarial cre que se “deben integrar os servizos de autobús e tren e favorecer o enlace co aeroporto”. Así, a estación intermodal, “debe estar no centro da cidade, para que os viaxeiros poidan moverse con facilidade”.

PROXECTO

Con todo isto, García Cumplido asegura que “a falta de recursos non xustifica que o proxecto deixe de ser prioritario”, polo que “hai que buscar os recursos”. O custo da obra formúlase en 25 millóns de euros “unha infraestrutura moderadamente barata” considera o Foro Cívico.

Por outro lado, hai que ter en conta que a cifra de viaxeiros aumentará coa chegada do AVE e, neste sentido, explicou que as condicións das estacións de tren e autobús “non se adaptan ás necesidades” do fluxo que acollen.

Os integrantes deste foro indicaron, ademais, que, pola súa situación, a estación de autobuses “aumenta a conxestión do tráfico e a contaminación acústica e ambiental”, ao que hai que sumar que “a zona non é céntrica”.

O Foro Cívico solicitará unha entrevista co novo alcalde para “trasladarlle as iniciativas e preocupacións pola cidade”, polo que polo que consideran que, con respecto á estación intermodal, “Hernández ten que manter a súa postura e seguir co proxecto”. Así, o seu voceiro, que non quixo valorar o novo goberno, si especificou que esta entidade “estará ao lado” da institución local “para dedicarse á cidade”.

A construción da estación intermodal remóntase ao convenio de colaboración asinado por, en aquel entón, o ministro de Fomento, José Blanco, o conselleiro de Infraestruturas, Agustín Hernández, e o alcalde da cidade, Xosé Sánchez Bugallo. Ademais, chegouse a licitar en 2011 a elaboración dun proxecto básico e de construción da nova estación.