O Concello de Ponte Caldelas repara o viario que comunica a igrexa de Santa Baia co cemiterio municipal

O Concello de Ponte Caldelas acaba de finalizar os traballos de reparación do viario de conexión entre a Igrexa de Santa Baia e o cemiterio municipal de Ponte Caldelas, dentro do plan de mantemento de estradas e camiños de titularidade municipal que leva a cabo esta administración local.

Os traballos consistiron na limpeza e reparación do firme, con eliminación de fochancas e defectos do pavimento producidos polo uso intensivo que recibe este viario debido a que é o que dá acceso ao cemiterio municipal e é por onde circulan os vehículos que acompañan os servizos fúnebres durante os enterros, ademais do tráfico normal dos automóbiles que trasladan ás persoas que de forma habitual visitan o camposanto.

Desde hai uns días, o Concello de Ponte Caldelas está a desenvolver unha intensa actividade tendente á reparación e mellora de viarias de titularidade municipal no que se está empregando fondos propios, así como convenios de actuación con outras administracións, como a Xunta ou a propia Deputación de Pontevedra, co obxectivo de solucionar problemas de seguridade viaria e reparación do pavimento, detectados en diversos lugares e parroquias do municipio.

Con esta iniciativa, o equipo que lidera o alcalde Perfecto Rodríguez pretende mellorar a comunicación viaria entre a vila e os distintos lugares e parroquias do termo municipal así como favorecer a rede viaria interior que permite o rápido e adecuado desprazamento en vehículo dos cidadáns por todo o territorio que conforma o municipio de Ponte Caldelas.