O Concello de Ourense considera un erro de forma os 41 contratos anulados polo TSXG

A directora xeral de Persoal do Concello de Ourense, Carmen Rodríguez, considerou que é un “erro de forma subsandable” a falta de motivación que o TSXG argumentou para anular 41 contratos de traballadores eventuais, tras unha denuncia do sindicato CSIF para impugnar toda a Relación de Postos de Traballo (RPT) de 2011

En rolda de prensa, a responsable de Persoal detallou que ningún traballador “será cesado pois hai dous meses para emendar esa falta de motivación”, e dixo falar co respaldo de informes técnicos da súa área, ao explicar que os contratos e a súa motivación “se fixeron como se fan dende hai moitos anos, dende cando gobernaba o PP”.

Nese sentido, indicou que a sentenza firme que anula os contratos por falta de motivación, non se debe a unha novidade no proceso de contratación, “senón á aplicación dun criterio novo no xulgado, pois antes nunca se impugnou unha RPT con ese argumento”.

Na sentenza referida, o TSXG estimou en parte o recurso de impugnación de toda a RPT presentada polo CSIF no contencioso-administrativo e se ve motivos de anulación para 41 contratos de tipo eventual cos que se cubriron postos como o de chofer e alguacil en alcaldía, varios do gabinete de comunicación, os de asesores dos catro grupos políticos e máis de 20 con responsabilidades de coordinación ou xefatura de servizo.

A xustificación para anulalos é que non está “debidamente xustificada a reserva” dos postos de asesoramento especial ou confianza, nin se xustifica a posibilidade “de aprovisionar os postos co persoal laboral”, no caso de algunhas das xefaturas. A sentenza tampouco vai “motivados” os postos de traballo previstos de libre designación.

NINGUÉN PERDERÁ O SEU TRABALLO

Na súa comparecencia, Rodríguez Dacosta dixo querer eliminar a “alarma creada polo posible cesamento de traballadores, que parece derivarse desta sentenza”. Segundo a directora xeral, ese cesamento non se producirá, pois no caso de xefes de servizo trátase de traballadores “que aprobaron unha oposición e xa estaban antes, cos gobernos do PP, así que non perden os seus postos de traballo”.

O equipo técnico municipal estuda a sentenza dende que a recibiu, o día 3 de xullo, pero que non houbera pública. Aínda que dá a posibilidade de presentar un recurso de casación en tres meses, Rodríguez indicou que non se recorrerá a esa opción, e engadiu que ninguén pediu a execución da sentenza, polo que “se”presentará unha subsanación do erro de forma argumentado pola sentenza, e seguindo as súas directrices para motivar os postos de traballo impugnados”.

A responsable de Persoal detallou que a RPT do Concello de Ourense se fixo “como en todos os concellos de España” e a sentenza do TSXG “non a anula, senón que di que hai que motivar eses 41 postos concretos cubertos con persoal eventual e de libre designación”. Engadiu que a motivación agora considerada insufiente polo TSXG “é a mesma que se usa dende 2004 e nunca foi impugnada”.

RPT NON É DOCUMENTO PRESUPOSTARIO

Tamén respondeu a preguntas sobre a influencia da sentenza nos presupostos municipais, o documento inicial dos cales foi rexeitado pola maioría de votos dos edís da oposición -PP, BNG e DO- o martes desta semana.

Dixo non existir mala fe por non informar aos grupos municipais sobre esta sentenza, coñecida días antes do pleno extraordinario de aprobación inicial dos presupostos, e argumentou que a RPT impugnada “non forma parte dos documentos presupostarios, así que non houbo ocultación, e a sentenza si se levou en prazo á xunta de Goberno de onte xoves,”, detallou Rodríguez.

A comparecencia de Rodríguez Dacosta produciuse tras a ausencia do alcalde Agustín Fernández, nun acto previsto nun colexio da cidade, ao que os medios de comunicación foron convocados para a visita institucional a escolares que participan en actividades de verán organizadas polo concello. Só acudiu a edila de Educación Ana Garrido, tamén prevista.