O Concello da Coruña colabora con 128.000 euros cos programas sociais de Cruz Vermella e ACLAD

O Concello da Coruña, na Xunta de Goberno Local celebrada esta mañá, aprobou destinar máis de 128.000 euros para colaborar con dúas entidades sociais da cidade -Cruz Vermella e Asociación Cidadá de Loita contra a Droga (ACLAD)-, dentro do espírito do Executivo municipal de traballar coas persoas que contan con menos recursos e que se atopan en risco de exclusión. Ademais, deuse o visto e prace a un investimento de 312.000 euros para contribuír á realización das actividades que organiza a Federación Provincial de Asociacións de Pais de Alumnos de Centros Públicos. En total, entre este tres convenios, o Concello consigna un orzamento de 440.000 euros.

SERVIZOS SOCIAIS

O Goberno municipal ten un especial interese por continuar coa estratexia marcada desde a Concellaría de Servizos Sociais para traballar de maneira conxunta coas entidades e institucións da cidade que centran os seus esforzos nas persoas que teñen menos recursos ou que se atopan en risco de exclusión. En 2014, o Concello incrementou o investimento para este tipo de convenios nun 17,3% con respecto a 2013, unha porcentaxe que sobe até o 64,5% si compárase co orzamento municipal de 2011.

Dous dos convenios para 2014 con entidades sociais que se ratificaron na Xunta de Goberno Local desta mañá son para a Asociación Cidadá de Loita contra a Droga (ACLAD) e para Cruz Vermella. No primeiro caso, trátase dunha subvención de 65.000 euros para apoiar a Unidade Móbil de atención ao drogodependente de ACLAD, que proporciona tratamento a uns 250 pacientes diarios. O Goberno municipal incrementa a axuda nun 8,3% con respecto a 2013, cando destinou 60.000 euros.

O Concello apoia desta maneira as actividades que realiza esta entidade para a defensa dos individuos e contra a utilización ilícita de todo tipo de drogas, pondo de manifesto o seu compromiso e implicación na loita contra a drogodependencia. O convenio con ACLAD complementa o Programa Municipal de Prevención de Drododependencias co que o actual equipo de goberno desenvolve accións educativas, informativas e integradoras nos ámbitos escolar, familiar e comunitario co obxectivo de cubrir o tres eixos da prevención.

O segundo dos convenios da área de Servizos Sociais para o que se autorizou a súa firma na Xunta de Goberno de hoxe é con Cruz Vermella para o programa de Transporte Sanitario. Neste caso, son 63.106,27 euros que permiten á entidade dispor dun vehículo sanitario na cidade para o traslado de persoas en situacións de emerxencia ou con algún tipo de problema de saúde que dificulte a súa mobilidade, complementando o labor realizado polo Sergas, o 061 e outras institucións comprometidas na atención sanitaria. Cruz Vermella atende a ao redor de 3.000 persoas ao ano a través deste servizo.

O convenio para o desenvolvemento do programa de Transporte Sanitario é só un dos acordos de colaboración que o Concello ten con Cruz Vermella. No orzamento inicial de 2014, o Goberno local xa destina máis de 185.000 euros para subvencións con esta entidade social: aos 63.106,27 euros para o programa de Transporte Sanitario, a Concellaría de Servizos Sociais suma outros 70.000 euros para o Servizo Municipal de Urxencias Sociais (SEMUS) e 40.000 euros para financiar o programa de axudas sociais que desenvolve Cruz Vermella. A maiores, a área de Deportes ten un convenio por 12.000 euros para dispor dunha ambulancia de Cruz Vermella nas instalacións municipais durante a celebración de eventos deportivos.

EDUCACIÓN

A Xunta de Goberno Local aprobou un terceiro convenio de colaboración. Neste caso, é a proposta da Concellaría de Educación, Deportes e Mocidade para contribuír con 312.000 euros á realización das actividades que realiza a Federación Provincial de Asociacións de Pais de Alumnos de Centros Públicos.

O departamento que dirixe Francisco Mourelo colabora coa entidade no desenvolvemento de todas as iniciativas que leva a cabo ao longo deste ano en materia educativa, deportiva, cultural e xuvenil, con especial atención a unha serie de programas:

– Coruña tardes: Programa de Lecer Educativo (POE), deporte no centro e xogos escolares.

– Coruña linguas: listen and speak, programa de linguas estranxeiras en Secundaria e o taller de iniciación á curtametraxe en galego.

– Coruña diversidade: un taller para alumnos con autismo (Teatro das emocións) e outro para alumnos con altas capacidades intelectuais (Proxecto QVO).

– Coruña tics: Click English.

– Coruña de aventura: visitas escolares, itinerarios e rutas urbanas animadas.

– Coruña no teatro: teatro escolar en inglés.

– Luditarde: programa de animación sociocultural baseado no tratamento da educación en valores.

– Calquera outro programa que se desenvolva ao longo do ano 2014 desde o Servizo Municipal de Educación.