O Campamento Deportivo de Oroso pecha as súas portas despois de rexistrar unha media semanal de 40 participantes

O II Campamento Deportivo de Oroso pechará as súas portas esta semana despois de rexistrar unha media de corenta participantes, de idades comprendidas entre os 4 e os 16 anos, por semana durante este mes de xullo. Un campamento organizado por Diver Patín, en colaboración co Concello de Oroso, clubs deportivos (Oroso TM, Taekwondo ITF e Rítmica Compostela) e empresas (Píkaras Diveractividades e Centro Deportivo Atmósfera Sport).

Durante estas catro semanas, os pequenos e pequenas gozaron dun campamento cheo de actividades de ocio, entre as que o deporte tiña un lugar predominante. Así, os participantes puideron practicar todo tipo de disciplinas deportivas: patinaxe, hóckey, taekwondo, bádminton, tenis de mesa, ximnasia rítmica, fútbol sala… Todo mesturado con distintas excursión, saídas á piscina, zumba kids, baile e distintos obradoiros celebrados no polideportivo municipal de Sigüeiro.