O 061 incorpora na época estival unha ambulancia medicalizada en Sanxenxo

Urxencias Sanitarias de Galicia-061, como en anos anteriores, implanta a partires do 12 de xullo unha ambulancia medicalizada en Sanxenxo debido ao aumento da poboación flotante na época estival. O cometido de Urxencias Sanitarias de Galicia é asegurar a maior rapidez de resposta ante calquera situación de emerxencia que se produza dentro da ampla e complexa xeografía galega.

Un ano máis, o 061 de Galicia, nos meses de xullo e agosto, contará as 24 horas cun recurso medicalizado ubicado en Sanxenxo que dará cobertura sanitaria aos concellos de Sanxenxo, Cambados, O Grove, Meaño, Meis, A Illa de Arousa, Vilanova de Arousa, Vilagarcía de Arousa e Ribadumia. Durante o período estival, a poboación destes concellos aumenta debido aos movementos de poboacións relacionados co turismo, favorecendo a existencia de grandes fluxos de circulación polas estradas e aumentando a siniestralidade por accidentes de tráfico.

Por todo o anterior, Urxencias Sanitarias, dende xa hai 14 anos, reforza nesta época a atención sanitaria urxente extrahospitalaria nesta zona, co obxectivo de que se cumpran os principios de eficiencia e equidade para a poboación galega.

A ambulancia medicalizada de Sanxenxo contará cun equipo humano composto por un médico e un enfermeiro especializado na atención sanitaria en situacións de emerxencias e dous técnicos en transporte sanitario urxente. O equipamento deste recurso permite prestar asistencia médica in situ a pacientes de extrema gravidade e asistilos durante o traslado a un centro hospitalario.

Por outra banda, esta ambulancia medicalizada apoiará a realización, en caso necesario, de traslados secundarios interhospitalarios de pacientes críticos dende o Hospital do Salnés, ubicado en Vilagarcía, ata os hospitais de referencia.

Recursos da zona

A Fundación Pública Urxencias Sanitarias de Galicia-061 para atender as demandas de urxencias sanitarias no ámbito extrahospitalario nos concellos de Sanxenxo, Cambados, O Grove, Meaño, Meis, A Illa de Arousa, Vilanova de Arousa, Vilagarcía de Arousa e Ribadumia conta con catro ambulancias asistenciais de soporte vital básico pertencentes a Rede de Transporte Sanitario Urxente, equipadas con dous técnicos en transporte sanitario e medicalizables cos médicos de Atención Primaria, se a situación o require.Ademais, esta zona conta coa ambulancia medicalizada de Pontevedra e o helicóptero medicalizado de Santiago.

Por último, destacar que dende xullo de 1998 o 061 coordina a Rede de Transporte Sanitario Urxente (R.T.S.U.) de Galicia. Trátase dunha rede permanente de ambulancias de urxencia, dispoñible as 24 horas do día, que dá cobertura á totalidade da Comunidade Galega, equipadas axeitadamente para a asistencia á urxencia e emerxencia, coordinadas e activadas exclusivamente a través da Central de Coordinación do 061.