Neira Vilas homenaxea a Díaz Pardo coa “crónica dunha fecunda amizade”

Novo libro de Xosé Neira Vilas

Xosé Neira Vilas, un dos grandes da literatura galega, presenta este mércores ás 20 h no Hotel Monumento San Francisco de Santiago a súa última obra, Isaac Díaz Pardo. Crónica dunha fecunda amizade, dispoñible xa nas librarías de Galicia.

Na presentación o autor estará acompañado do presidente do Consello da Cultura Galega, Ramón Villares; o profesor e secretario da Real Academia Galega, Henrique Monteagudo; o secretario xeral de Política Lingüística, Valentín García, e o editor da obra, Antonio Couto.

A publicación, de 426 páxinas, estrutúrase en dúas partes, diferenciadas visualmente pola cor do papel, máis clara na primeira parte, onde o autor relata a súa relación con Díaz Pardo máis escura na segunda, onde se transcriben as case 300 cartas cruzadas polo matrimonio Neira Vilas – Anisia con Isaac Díaz Pardo. O libro é, por tanto, a crónica dunha amizade pero é tamén unha homenaxe a un dos grandes artistas galegos de todos os tempos.