Negreira visita as obras de renovación do bordo litoral nas que xa se investiron 1,6 millóns de euros

O alcalde da Coruña na visita ás obras

O alcalde da Coruña, Carlos Negreira, realizou unha visita ao paseo marítimo para comprobar o resultado das obras que, durante os últimos meses, acometéronse dentro do plan de reordenación do bordo litoral. En concreto, achegouse á zona comprendida entre a rúa Sol e a escalinata de acceso á praia do Matadoiro, correspondente á cuarta fase e dispoñible para os veciños e turistas desde a semana previa ao San Juan.

O Concello investiu até o momento 1,6 millóns de euros na renovación do paseo tendo en conta as directrices e solucións expostas no concurso de ideas ao que se presentaron 83 propostas co obxectivo de integrar a cidade na paisaxe, achegar os cidadáns á praia e mellorar a súa perspectiva visual.

Das seis fases previstas, as catro primeiras están finalizadas: a primeira fase consistiu na renovación do paseo entre as Escravas e a Fonte dos Surfeiros; a segunda fase foi a remodelación da Coraza do Orzán; a terceira incluíu a renovación desde a praza de Portugal á rúa Pondal; mentres que a cuarta abarcou o tramo entre a rúa Sol e Matadoiro. A quinta -mellora de accesibilidade en Riazor- adxudicouse e comezará en setembro, mentres que a sexta e última consistente na mellora da eficiencia da iluminación no paseo marítimo atópase en fase de redacción.

QUINTA FASE

A quinta fase, que comezará despois do verán e que corresponde ás melloras de accesibilidade na praia de Riazor, foi adxudicada por 668.525 euros, o que supón unha rebaixa do 21% con respecto ao orzamento de licitación.

A UTE Ogmios Proxecto e Operis Obras e Mantemento farase cargo dos traballos, tras ser a proposición máis vantaxosa das 21 que se presentaron. A actuación axústase ao concurso de ideas para a renovación do bordo litoral e inclúe a solución graduada en forma de miradoiro para salvar o desnivel actual entre o paseo e a praia. Os novos tramos de bancada estarán ancorados ao muro do paseo e cumprirán unha dobre función: mellorar a accesibilidade ao areal e como zona de estancia para goce da praia por parte dos cidadáns.

O proxecto tamén recolle a substitución das duchas e dos lavapés situados xunto ás rúas Modesta Goicouría e Pondal, que serán de aceiro inoxidable.

Ademais da eliminación da balaustrada e das 21 columnas de iluminación que se atopaban sobre esta estrutura, no tramo entre a Coraza e o punto de acceso máis próximo á praia de Riazor proxéctase unha varanda de bronce de idénticas características á que está colocada na Coraza. O obxectivo é facilitar a visión do mar desde o propio paseo.

Para favorecer a accesibilidade á praia e pór fin ás barreiras arquitectónicas do pasado, o Goberno local programa unha serie de actuacións:

– No acceso próximo á Coraza, colocarase unha rampla de formigón impreso -cunha pendente do 6%- para substituír unha das escaleiras de acceso á praia; mentres que outra escaleira modifícase para que sexa perpendicular ao muro do paseo.

– No acceso máis próximo á rúa Pondal, modifícase a rampla para que o pendente pase do 18,5% ao 6% de desnivel. Ademais, a escaleira tamén se modifica para que sexa perpendicular ao paseo.

– Se recrecen o tres plataformas que se atopan baixo os accesos actuais para reducir a cota entre o paseo e o areal.