“Mergúllate no Océano” converte a praia de Compostela en laboratorio de investigación

“Mergúllate no Océano”, unha acción de divulgación científica promovida polo Campus do Mar, da Universidade de Vigo, ofrecerá multitude de actividades de divulgación científica na praia de Compostela, este sábado e domingo, a partir das once da mañá. O laboratorio ten por obxecto achegar as ciencias e tecnoloxías mariñas á sociedade e concienciar sobre a importancia que para o progreso da humanidade teñen o coñecemento e a conservación dos océanos. Así, durante esta fin de semana os participantes poderán sentirse como auténticos científicos mariños realizando coas súas propias mans sinxelos experimentos e descubrindo como funcionan os océanos.

“Mergúllate no Océano” concíbese como un recinto expositivo duns douscentos metros cadrados de extensión no que, a través de sete obradoiros, os visitantes poderán descubrir, por exemplo, de onde procede o peixe que comemos habitualmente, como funcionan as correntes mariñas, que hai nunha pinga de auga de mar, os impactos que ten a acidificación dos océanos derivada das emisións de CO2, ou a importancia que teñen as dunas nos ecosistemas. Os monitores, expertos en divulgación, buscan en cada unha das actividades implicar ao público asistente e espertar a súa curiosidade plantexándolles pequenos retos para que, como fan día a día os investigadores, podan chegar a descubrir o funcionamento do mar e dos seres que o habitan.

Aqueles que queiran participar nesta experiencia recibirán á entrada un pasaporte que deberán ir selando en cada un dos obradoiros a medida que van completando as diferentes actividades propostas, que abranguen ámbitos tan variados como a ecoloxía, a bioloxía mariña, a oceanografía ou as tecnoloxías aplicadas ao medio mariño. Unha vez acaden todos os selos serán xa uns auténticos científicos mariños e poderán cambiar o seu pasaporte por un pequeno agasallo á saída.