La Habitación Roja, Caxade, Soledad Vélez ou Txetxu Altube entre os artistas do festival Ribeiro Son de Viño

La Habitación Roja, Caxade, Modelo de Respuesta Polar, Fabián, Soledad Vélez e Txetxu Altube dos Madison son as bandas que intercalarán os seus concertos con catas dirixidas de viños de prestixio e recoñecemento internacional da D.O. Ribeiro nun enclave único: o Náutico de San Vicente do Mar, desde a sesión vermuth até as 05.00 da mañá.

O C.R.D.O. Ribeiro decidiu crear este festival para apoiar cultura do viño e música dirixíndose a un público novo, con inquietudes enogastronómicas, á vez que pon en valor os viños coa maior tradición e historia de Galicia, representados por seis adegas do Ribeiro; Viña Meín, Ramón do Casar, Viña Costeira, Viña Reboreda, Coto de Gomariz, e Cuñas Davia.

As catas de viño estarán dirixidas por profesionais das adegas, que contarán aos asistentes as características e peculiaridades dalgunhas das mellores referencias da D.O. Ribeiro. Todas as catas acompañaranse de bocados gastronómicos e intercalaranse cos concertos das bandas protagonistas, que tocan por primeira vez no Náutico de San Vicente.

Ribeiro Son de Viño nace coa intención de reforzar a privilexiada situación dos seus viños nas zonas turísticas das Rías Baixas Galegas, e promocionalos a través da música de bandas chegadas de toda España para apoiar os viños da D.O. Ribeiro.

Ribeiro Son de Viño celébrase o próximo 19 de xullo no Náutico de San Vicente do Mar; O obxectivo principal é compatibilizar arte, cultura gastronómica, música e un consumo responsable de viño e así potenciar a accesibilidade ao entendemento do viño sen tecnicismos, para que o consumidor valore, entenda e goce plenamente de produtos tan diferenciados como o son os viños das máis de 100 adegas da Denominación de Orixe máis antiga de Galicia.