Hernández respecta que os veciños de Angrois non acudan ás medallas e teme que o lugar se converta nun pseudoestudo de gravación

O alcalde de Santiago, Agustín Hernández, mostrou este venres a súa “preocupación” ante a posibilidade de que Angrois se converta, durante a próxima semana, nun “pseudoestudo” de gravación.

De feito, asegurou, tras a Xunta de Goberno Local, que comparte a opinión dos veciños de Angrois, que decidiron non acudir á entrega das Medallas de Galicia o próxima día 24 a considerar que é unha xornada de “recollemento e silencio”.

De tódolos xeitos, o rexedor compostelano remarcou que respectan “tódolos posicionamentos”, tanto o dos veciños de Angrois como o dos servizos de emerxencias que acudiron ao lugar do sinistro ferroviario tras o accidente. E é que os Bombeiros de Santiago e a Policía Local si acudirán á entrega de medallas.

Preguntado por se a Xunta debía falar previamente cos veciños para, posteriormente, poñer data á entrega das Medallas de Galicia, Hernández rexeitou “entrar en polémica” e fixo fincapé en que descoñece se “falou ou non”.

Neste sentido, subliñou que non está “en condicións de valorar” cáles foron as “razóns” do Goberno galego para escoller o próximo día 24, cando se cumpre un ano do sinistro ferroviario que acabou coa vida de 79 persoas en Angrois, para entregar as Medallas de Galicia.

“MÁXIMO REALCE E SOLEMNIDADE”

Aínda así, destacou que se o Goberno dirixido por Alberto Núñez Feijóo optou por esta data, foi para darlle o “máximo realce e solemnidade”.

Con respecto á entrega das Medallas de Galicia, Hernández pediu aos compostelanos que, a pesar de que “só” os Bombeiros de Santiago e a Policía Local vaian ser recoñecidos na entrega de Medallas, visualicen tamén ao Cersia, a Protección Civil e aos servizos sociais que deron asistencia ás familias das vítimas.

Preguntado polo feito de que a Xunta recoñecese só o labor dos Bombeiros de Santiago e da Policía Local, Hernández sinalou que hai que preguntalo ao Goberno galego, pois ao Concello compostelano “non lle corresponde”.

Aínda así, deduciu que este feito se pode deber a que a participación dalgúns profesionais podería parecer “máis secundaria”.

PARQUE CONMEMORATIVO

Hernández anunciou a aprobación do texto de convenio de colaboración entre Adif, Renfe-Operadora, a Fundación dos Ferrocarrís e o propio Concello de Santiago para a construción dun parque conmemorativo na zona do accidente ferroviario de Angrois.

Deste xeito, realizarase un campo da festa, unha pista polideportiva, unha zona de descanso para peregrinos, un parque público e un parque infantil. Así mesmo, tamén se efectuará un almacén para os veciños, que aínda ha de ser aprobado. Todo iso, supón unha inversión total de 300.000 euros.