Comezan as obras de reparación da pista de tenis e a reposición de caucho no campo de fútbol de herba artificial de Ponte Caldelas

As obras de reparación da pista de tenis e a reposición de caucho no campo de fútbol de herba artificial de Ponte Caldelas comezarán a realizarse este luns dentro das actuacións incluídas polo Concello no Plan Urxente de Mantemento de Servizos e Infraestruturas Municipais 2014 (PUSIM) posto en marcha pola Deputación de Pontevedra.

A empresa adxudicataria da obra foi Mecanosport, que ofertou como mellora dúas actuacións máis de mantemento no campo de fútbol de herba sintética a realizar aos 6 e 12 meses despois da intervención inicial, ademais de máis cantidade de caucho para estas intervencións, así como unha rede completa para a pista de tenis como os correspondentes postes.

Os traballos que comezarán este luns contan cun orzamento de 30.368,58 euros e pretenden ser executados no máis curto espazo de tempo posible co fin de que estas instalacións estean en perfecto estado de uso para que poidan ser aproveitadas durante a tempada estival que agora comeza.

O paso do tempo e o uso das instalacións deportivas han ido provocando o seu desgaste polo que o Concello de Ponte Caldelas incluíu a reparación da pista de tenis e o caucho do campo de fútbol no PUSIM.

No caso da pista de tenis ao aire libre situada na zona deportiva de Chan da Barcia, o desgaste afecta o piso da propia cancha polo que se procederá á subministración e colocación de grávaa para recuperar a drenaxe antiga para, posteriormente, colocar o novo pavimento definitivo da pista que se realizará con formigón poroso. Despois será pintado por proxección acabado a base de resina de cor vermella. Tamén se acometerá o pintado das liñas de xogo para a práctica de deportes como o tenis, o fútbol sala e o balonmán.

No caso do campo de fútbol de herba artificial acometeranse traballos de mellora a base da suministración e colocación de caucho SBR negro, ao detectarse unha perda importante por efecto da práctica cotiá de deporte sobre esta superficie e a acción das intensas choivas caídas ao longo deste inverno que provocaron a súa deterioración.

O Concello de Ponte Caldelas inclúe estas obras no PUSIM na necesidade de manter en perfecto estado para a práctica do deporte, sen risco para os usuarios, as instalacións deportivas municipais. Ademais, existe unha importante demanda de uso como o acredita a existencia dun club de tenis que utiliza estas instalacións ao aire libre, sobre todo cando o permite o estado do tempo metereológico, que alterna co pavillón, recentemente remodelado, para realizar os seus adestramentos.

En canto ao campo de fútbol de herba artificial recibe un uso continuado por un gran número de mozos pertencentes ás escolas deportivas da Sociedade Cultural Deportiva Pontecaldelas así como polo primeiro equipo desta entidade, o cal xustifica a necesidade do seu mantemento adecuado por parte do Concello, propietario das instalacións.