Catro barcos portacontedores descargan ao mesmo tempo por primeira vez no porto de Vigo

Barcos portacontedores descargando no peirao de Guixar

O Porto de Vigo vivirá ao longo de hoxe unha xornada histórica, coa escala simultánea de catro buques portacontedores no Peirao de Guixar.

Unha operativa que até agora non era posible debido ás limitacións do peirao, que só permitían como máximo a escala de tres buques, manténdose o cuarto fondeado e á espera de que os restantes terminasen a súa operativa.

Esta cuádruple escala foi posible tras a ampliación da Terminal de Colectores, que pasou de 125.000 m² a 180.000 m²de superficie grazas á reorganización de tráficos que supuxo a ampliación do Peirao do Arenal, onde se trasladou toda a mercadoría xeral, deixando Guixar unicamente para o tráfico de colectores.

Así mesmo, a Terminal conta cun novo guindastre Super Post Panamax con condicións técnicas inigualables, que se suma aos outros tres grandes guindastres portainer de diferentes alcances: Feeder, Panamax e Post Panamax

Todo iso, repercutiu, sen ningunha dúbida, no incremento da capacidade operativa da Terminal, tal e como quedou demostrado hoxe, coa escala do WEC Velázquez, consignado por WEC Lines España, o Sophie, de Comarsa, o Samaria e o Herm J, representados por Joaquín Davila e Cía. En total, están previstos preto de 2.500 movementos ao longo da xornada, o que suporá máis de 45.000 toneladas de mercadoría, das que, aproximadamente a metade, será embarcada rumbo a Sines, Róterdan, Leixoes ou Bilbao.

O pasado ano o Porto de Vigo rexistrou unha marca histórica no tráfico de mercadoría movida por colector en guindastre, ao alcanzar as 2.200.000 toneladas, aproximadamente, o que demostra que Vigo é un porto especializado, a través do que se moven preto do 80% dos colectores do conxunto de Galicia.