Avanzan as actuacións de Costas para recuperar o areal das Canas

O alcalde de Nigrán, Alberto Valverde, e o concelleiro de Medio Ambiente, Antonio Vidal Meneses, desprazáronse hoxe á praia das Canas, en Priegue, para comprobar a evolución das actuacións iniciadas onte pola Xefatura Provincial de Costas para mellorar o estado deste areal.

As accións previstas pola demarcación provincial, consistentes en redistribuír os cantos rodados da primeira liña de praia, co fin de eliminar a barreira natural que forman e axudar a que o nivel da area suba con maior celeridade, avanzan de forma favorable, e o rexedor agarda que, con estes traballos, a praia recupere con maior celeridade a area retida polo mar ao longo do último inverno.

O rexedor mostrouse satisfeito de que a formulación de Costas para resolver esta situación do areal, consecuencia dos temporais do pasado inverno e das fortes mareas vivas das últimas semanas, está a dar os seus froitos, “xa que naquelas zonas nas que a actuación de Costas realizouse, obsérvase claramente como a praia gañou metros de area”, engadiu.