As praias de Doniños, San Xurxo, Esmelle e A Fragata xa lucen as súas bandeiras azuis

O alcalde de Ferrol no izado dunha das bandeiras

Nas praias de Doniños, San Xurxo, Esmelle e A Fragata ondean dende este mediodía as Bandeiras Azuis, que concede a Asociación de Educación Ambiental e do Consumidor (ADEAC), e que certifican a calidade ambiental e dos servizos que están a disposición dos usuarios destes areeiros. Así, o litoral ferrolán duplica durante a tempada oficial de praias o número de praias distinguidas por esta entidade. Diferentes representantes veciñais acompañaron ao alcalde de Ferrol, Jose Manuel Rey Varela, durante o acto de izado de bandeira que tivo lugar este mediodía no areeiro de San Xurxo. Ao mesmo tamén asistiron os concelleiros de Medio Ambiente e Servizos, Turismo e Zona Rural, Borja Carro Muñoz, María del Carmen García Fraga e José Polo Veiga, respectivamente.

Durante estes días, os servizos municipais realizaron tarefas de mellora e mantemento das praias. Estes traballos consistiron no arranxo das casetas de vixilancia, reposición de aseos e duchas, sinais indicativos e carteis, vallas e pasarelas e outros elementos de madeira. Máis concretamente, foron instaladas 22 vallas de catro metros para reserva de ambulancias, 20 sinais de reservado a ambulancias, 13 paneis indicativos de servizos dispoñibles, 10 paneis de “Fin de zona vixiada”, 10 sinais de “Prohibido o paso excepto autorizados”, 3 vallas de “Espazo reservado para minusválidos”, unha sinal de “Prohibido aparcar/estacionar” en 10 metros e outra en 100 metros. O investimento nestes traballos de mantemento e mellora dos servizos nas praias ascendeu a preto de 40.000 euros.

Socorrismo

No que atinxe a vixilancia e o socorrismo, o servizo contará con 46 socorristas dispoñibles, de tal xeito que permanentemente durante o horario de vixilancia haberá distribuídos nos areeiros unha trintena de profesionais. Cifra que poderá verse incrementada en momentos puntuais por necesidades do servizo. Os profesionais velarán pola seguridade dos usuarios das zonas de baño nas praias de Doniños-Penencia, Covas, San Xurxo, Esmelle, Ponzos, Santa Comba, Caranza e A Graña. O servizo de socorrismo será prestado dende hoxe até o 31 de agosto e en horario ininterrompido de 12:00 a 20:00 horas.