As festas de San Froilán de 2013 foron as máis baratas dos últimos anos

A Concelleira de Cultura, Turismo, Xuventude e Promoción da Lingua, Carmen Basadre, anunciou hoxe a actuación do grupo “Les Tambours du Bronx” nas festas de San Froilán. Este grupo non puido ofrecer o concerto previsto no programa do ano pasado porque tiveron problemas para transportar o seu material escénico, que lles quedou retido en Sao Paulo logo de participar no festival Rock in Río.

Esta é a segunda actuación internacional que anuncia Carmen Basadre para o San Froilán 2014, no que tamén está previsto un concerto do famoso grupo cubano Buenavista Social Club.

A Concelleira de Cultura destacou tamén que nas festas deste ano haberá moitas actividades na rúa, o San Froilán chegará ata o barrio da Ponte e o San Froilán miudo volverase celebrar no aparcamento do Seminario.

Carmen Basadre fixo estes anuncios nunha rolda de prensa posterior a xuntanza que celebrou hoxe a Comisión de festas, na que se informou do nomeamento como Comisario do Feiral de José Manuel Río Espiño, deuse conta da tramitación administrativa para a contratación da iluminación das festas e das infraestruras e casetas do feiral.

Festas máis baratas

Na Comisión de festas tamén se facilitou información sobre o balance económico do San Froilán 2013, que, segundo destacou Carmen Basadre, “foron as festas máis baratas alomenos dos catro últimos anos”.

O balance das contas presentado pola Área de Cultura e corroborado polo Servizo de Intervención supón que as festas de San Froilán 2013 tiveron uns gastos totales de 652.137,80 euros e a recadación total foi de 560.223,82 euros.

Estes datos supoñen que o gasto final estivo moi axustado ó presupostado, que era de 635.000 euros. Ademais, a aportación que finalmente tiveron que facer os lucenses á celebración das festas, unha vez descontados os ingresos obtidos, foi de só 91.913,98 euros.

A Concelleira de Cultura lembrou que o gasto nas festas de San Froilán foi de 890.000 euros no ano 2010, de 843.290 no ano 2011 e de 683.440 no ano 2012.

Subvencións de Cultura e Xuventude

Carmen Basadre tamén anunciou hoxe a convocatoria das subvencións a asociacións que concede o Concello nas áreas de Cultura e de Xuventude.

No caso das asociacións culturais, o importe total desta liña de axudas do Concello é de 24.500 euros e a convocatoria xa está aberta. O prazo para a presentación de solicitudes permanecerá aberto ata o día 18 de agosto.

As axudas de Xuventude, que teñen un importe de 10.000 euros, poderanse solicitar, previsiblemente, a partir do 1 de agosto e durante o prazo dun mes, xa que está pendente a publicación da convocatoria no BOP e o DOG.

En todos os casos, unha vez publicadas, as bases pódense consultar tanto nos boletíns oficiais como na web municipal, www.lugo.es, como no taboleiro de anuncios do Concello.