Arrinca o II Clínic “Desmontando ao adestrador axudante”

O II Clínic “Desmontando ao Adestrador Axudante” prepárase xa para recibir a relatores e inscritos no pavillón da Cachada, en Boiro, durante este venres e este sábado.

Serán dúas xornadas cargadas de aprendizaxe para todos os asistentes, tanto adestradores axudantes como primeiros técnicos de equipos de base que pretenden adaptar á súa realidade todo o que alí poidan aprender. Un dos inscritos deste ano será Víctor Pérez, adestrador axudante do Rio Natura Monbus, que tamén exercerá como anfitrión. “O máis importante destes eventos é compartir experiencias con outras persoas coa mesma paixón e traballo que ti, e que ou ben xa coñeces, ou directamente coñeces alí”, afirmou.

O Clínic, que comezará o venres ás 16.00 coa entrega do material aos inscritos, serán dous días nos que o oito convidados explicarán conceptos dos temas elixidos e debateranos cos asistentes. Serán Juancho Armental, psicólogo deportivo; Antonio Pérez, novo adestrador do C.B. Clavijo e axudante do CB Valladolid a pasada campaña; Federico Fucá, adestrador axudante do Virtus Roma; Jesús Ramírez, axudante do Ratiopharm Ulm; Agustí Julbe, ex segundo técnico do F.C. Barcelona; Diego Ocampo, novo adestrador do UCAM Murcia que estivo como asistente de Aíto García Reneses en Sevilla nos últimos anos, e Alberto Camba e José Alonso, expertos en tecnoloxía deportiva.

Para facilitar o desprazamento a Boiro dos participantes, Monbus –membro do Club de Empresas Obradoiro- fretará un autocar desde Santiago (Multiusos do Sar), os dous días da cita, no que aínda se pode reservar praza a través do correo clinic@obradoirocab.com. Tamén se facilitará o seguimento das conferencias aos que non poidan asistir mediante o Twitter do evento: \<sent\>ClinicObradoiro.