Apertura da matrícula no Máster Terra da Universidade de Santiago de Compostela

A Universidade de Santiago de Compostela mantén aberto ata o 6 de agosto o prazo de inscrición na edición 2014-2015 do Máster Oficial en Xestión Sustentable da Terra e do Territorio, uns estudos de máxima actualidade.

A USC, a través do Laboratorio do Territorio, convoca por quinto ano consecutivo o Máster Terra, un título que está tendo moi boa acollida entre o alumnado pola súa adaptación ás necesidades reais e urxentes de deseñar novos modelos de xestión dos usos do solo adecuados ás características de cada espazo. Trátase dunha esixencia de optimización proveniente de sectores coma o agrogandeiro e acrecentada polo enfoque da nova PAC, a ameaza dos incendios forestais e os conflitos urbanísticos.

Como indicador de calidade do máster cabe destacar o elevado grao de colocación dos seus egresados, respondendo así á demanda laboral actual e amosando a importancia da xestión de terras e do territorio en todas as súas dimensións.

Un máster flexible

O Máster Terra impartirase de setembro de 2014 a xullo de 2015, de luns a xoves e en horario de tarde, na Escola Politécnica Superior e no Instituto de Biodiversidade Agraria e Desenvolvemento Rural, ambos os dous centros do Campus de Lugo. Non obstante, como novidade, agora poderá cursarse tamén na modalidade telepresencial, a través de videoconferencias, dende calquera parte do mundo.

A USC validará o título con 60 créditos, que se obterán ben durante un ano académico, ben durante dous, se se escolle realizar este máster a tempo parcial.

As clases ofreceranse en galego e en castelán pero requírese un bo coñecemento do inglés para o seguimento de todas as actividades programadas, tales coma as presentacións de expertos internacionais.

As saídas

As persoas que fagan este máster terán opción a un contrato de investigación de 6 meses e acceso ao doutoramento específico (DoctoraTe), e poderán colaborar con institucións de distintos países, facer prácticas no exterior durante o período lectivo, formarse nas últimas tecnoloxías da información xeoespacial ou ver publicados os seus traballos de fin de máster.

Con límite de prazas

Existen 22 prazas dispoñibles, das cales 3 son para a modalidade de matrícula a tempo parcial e 8 están reservadas a alumnos estranxeiros. Para apuntarse hai que rexistrarse e solicitar a admisión na páxina da secretaría virtual da USC, cuxo enlace se atopa na web oficial do máster, masterterra.usc.es.