Andaina nocturna pola ‘Ruta dos Carros’ en Verín

O vindeiro 19 de xullo terá lugar a primeira andaina nocturna ‘Ruta dos Carros’, organizada polo Concello de Verín e Asociación de sendeirismo Ruta das Augas, coa colaboración de Protección Civil Verín, Multisport, Cabreiroá e Sendeiristas de Monterrei.

A andaina, cunha distancia de 11 quilómetros e dificultade baixa, percorrerá a ‘Ruta dos Carros’, unha antiga vía que comunicaba o núcleo de Cabreiroá (Verín) co de A Veiga das Meás (Vilardevós), así coma o ‘Camiño do Malpaso’, dúas vías que foron rehabilitadas polos alumnos/as dos módulos de xardinería e carpintería dos obradoiros de emprego ‘Pozo do Demo’.

A saída será ás 21.30 horas desde o Pavillón Municipal de Deportes (R/Irmáns Moreno s/n), e para participar nesta andaina é necesario inscribirse antes do venres en Multisport Verín (R/Irmáns Moreno 19 ou nos teléfonos 988-414423 e 600-410018). O custe da inscrición serán 5 euros, que serán doados integramente para o tratamento de rehabilitación neurolóxica de Valeria De Dios, unha pequena verinense de catro anos que padece unha ataxia cerebelosa non filiada. Para participar nesta andaina será imprescindible levar lanterna.