Alfredo Bea repite como presidente da Federación Galega de Piragüismo

Alfredo Bea foi reelixido presidente da Federación Galega de Piragüismo durante catro anos máis tras pecharse o proceso electoral. O dirixente, que ocupará o cargo até 2018, foi o único candidato que se presentou ás eleccións. O seu obxectivo para o novo mandato é “investir nos clubs e os deportistas”.

O presidente recalcou que “logramos sanear a federación e evitar un colapso. Aínda non se eliminou toda a débeda, pero o seguinte reto, a partir de 2016, é poder investir”. Alfredo Bea destacou que “o balance económico dos últimos anos foi positivo. Realizamos un gran esforzo nese aspecto”.

Alfredo Bea, que será presidente até 2018, tamén indicou que “no aspecto deportivo tamén melloramos. Catorce padexeiros galegos irán ao próximo Campionato do Mundo en Moscova. Pero tamén nos ilusionan especialmente os bos resultados dos galegos no Campionato de España de novas promesas. Esa é a base do futuro”.

Tamén destacou o dirixente que “medramos no número de licenzas un trinta por cento nos últimos tres anos. É algo vital que o piragüismo siga tendo interese e mantendo un alto nivel de actividade”.

Alfredo Bea insistiu que “a prioridade da xunta directiva é sanear de maneira definitiva a federación. E despois investir. Os clubs e os deportistas son os que necesitan o noso apoio”.

Alfredo Bea foi catro veces olímpico. O seu mellor resultado logrouno nos Xogos de Sydney ao lograr o cuarto posto en C-2 1.000 metros. Preside a Federación Galega de Piragüismo desde 2009.