Adestramento do equipo nacional de 420 no Centro Galego de Vela

Hoxe terminou no Centro Galego de Vela a concentración da clase 420 preparatoria para os Campionatos Internacionais do Equipo Nacional que organizou a Federación Galega de Vela. Catro tripulacións participaron no adestramento que se levou a cabo no Centro Galego de Vela, incluíndo a participación na regata clasificatoria que tivo lugar en Foz o pasado fin de semana.
As tripulacións  convidadas foron:

– Silvia Mais e Marta Davila  do CN Masnou.

– Santi Mais e Luís Mais do CN Masnou.

– Adrián Domínguez e Calixto Abalo do LC Vilagarcía.

– Andrés Álvarez e Sergio Rodríguez do LC Vilagarcía.

O adestramento empezou en Foz coa participación na regata clasificatoria para a Selección Galega de Vela de 420, onde asistiron 18 tripulacións de clubs de toda a Comunidade Galega así como as 2 mencionadas tripulacións catalás. As duras condicións de vento do sábado soamente permitiron celebrar 3 mangas o domingo con dominio da experta tripulación catalá de Santi e Luís Mais seguidos de Adrián e Calixto. A terceira posición fué para Silvia e Marta tamén do CN Masnou mentres que os actuais Campións de España Xuvenís e Subcampións Absolutos tiveron que conformarse coa cuarta praza.

Queremos destacar a asistencia da maior parte da flota galega de 420, incluíndo a novísimas tripulacións que teñen un gran futuro por diante, así como a participación da recente flota creada no CM Oza “Ou Puntal” da man de Miguel Fernández Vasco.

Tras a proba de Foz, as 4 tripulacións establecéronse no CGV de Vilagarcía para completar 3 días de intensos adestramentos. Queremos agradecer a asistencia ás 2 tripulacións catalás polo desprazamento até Galicia.

A partir de mañá a apertada axenda dos 4 equipos continúa e desde o CGV desexamos que acabe con grandes resultados e grandes aprendizaxes:

– Campionato do Mundo ISAF Xuvenil; 12 ao 19 Xullo.  Un só representante por país, participan Silvia Mais e Marta Davila en categoría Feminina e Andrés Álvarez e Sergio Rodríguez en masculina.

– Campionato do Mundo Absoluto en Travemunde (Alemaña); do 22 de Xullo ao 2 de Agosto.

– Campionato de Europa Xuvenil do 8 ao 17 de Agosto en Gdynia (Polonia).