A Zona Franca de Vigo e o Concello ultiman a venda do antigo reitorado para instalar un centro gastronómico

O Concello de Vigo e a Zona Franca de Vigo aprobaron o texto dun convenio de colaboración no que se incluirán, entre outros proxectos, a venda do antigo reitorado (para instalar un centro gastronómico), a ampliación do parque tecnolóxico e loxístico de Valadares, ou a creación dun espazo ‘co working’ no auditorio pazo de congresos.

Segundo explicou o alcalde, Abel Caballero, en declaracións aos medios, o Concello acometerá unha modificación puntual do Plan Xeral (que afecta a unha estrada) para permitir a ampliación do parque tecnolóxico. O acordo con Zona Franca inclúe o financiamento das liñas eléctricas nesa actuación.

No que respecta ao antigo reitorado, na rúa Areal, o alcalde sinalou que Zona Franca vai adquirir o edificio para instalar nel un “centro de evolución gastronómica de Galicia”. O organismo estatal pagará polo inmoble prezo de mercado”, segundo indiquen os técnicos.

Finalmente, Caballero tamén informou de que o Concello colaborará con Zona Franca e coa Cámara de Comercio para instalar, en dependencias do auditorio pazo de congresos ‘Mar de Vigo’, un espazo de ‘co working’ e un viveiro de empresas. Esta iniciativa será cofinanciada polas tres institucións.