A Xunta anima aos investidores vigueses a integrarse na futura rede galega de Business Angels

Encontro de traballo con representantes de RedInvest

Os directores do Igape, Javier Aguilera, e de Xesgalicia, Juan Cividanes, mantiveron esta mañá nun encontro de traballo con representantes de RedInvest e potenciais investidores co obxecto de animalos a integrarse na futura Rede Galega de Investidores particulares de apoio ao emprendemento, prevista na Lei do emprendemento.

Durante o encontro desenvolvido no Circulo de Empresarios de Galicia-CFV, Aguilera e Cividanes coincidiron en salientar que é fundamental facilitar a confluencia de recursos privados e públicos, de forma coordinada e eficiente, para procurar que os proxectos emprendedores viables atopen o financiamento máis axeitado ás súas necesidades.

Entre os diferentes instrumentos de apoio que para facilitar os investimentos promovidos por novos emprendedores dentro do programa Galicia 1000, Aguilera destacou os préstamos directos Jeremie, para financiar operacións a partir de 70.000 euros; os microcréditos de ata 25.000 euros, con xuros que poden acadar bonificacións de ata 4 puntos; e os préstamos comprendidos entre 25.000 e 1 millón de euros, tamén bonificados polo instituto.

Ao mesmo tempo, o director de Xesgalicia lembrou que está operativo o fondo de capital risco Galicia Emprende, destinado a financiar, conxuntamente con investidores particulares integrados na futura rede galega, novos proxectos de emprendedores con investimentos comprendidos entre 35.000 e 500.000 euros.