A Sociedade Ximnástica de Pontevedra formará parte da Asemblea da Federación Galega de Atletismo

Continúa o calendario electoral da Federación Galega de Atletismo para a elección dos seus órganos de goberno para os próximos catro anos.

A xunta electoral acaba de oficializar os resultados das eleccións a membros da Asemblea, máximo órgano de goberno da Federación; principalmente encargado de aprobar o calendario, as contas federativas e elixir ao Presidente.

Na nova Asemblea, que se reunirá o próximo 31 de xullo para a elección do Presidente, estará de novo a Sociedade Ximnástica de Pontevedra no Estamento de Clubs, ademais outros membros da Ximnástica formarán parte da nova Asemblea representando a outros Estamentos. No estamento de atletas, Martín Brea, David Salgas, Juan Pablo Fernández e Alex Solla e no Estamento de adestradores, Santiago Ferrer Moreira e José Manuel Lombao.

Nunca antes tantos membros do equipo pontevedrés formaran parte da Asemblea federativa; o que demostra o seu interese por seguir achegando ideas no desenvolvemento do atletismo galego, desde un posto de responsabilidade.

Nesta semana e até o xoves coñeceranse os candidatos a presidir a Federación Galega de Atletismo.