A oposición de Ourense tumba a fase inicial de aprobación do orzamento municipal

Os 16 votos que suman PP, BNG e Democracia Ourensá (DO) no Concello ourensán uníronse este martes para tumbar a fase inicial de aprobación do orzamento desta cidade para 2014 que propuña o goberno en minoría do PSdeG e que se eleva a 104 millóns de euros.

Así, a Corporación de Ourense rexeitou provisionalmente o orzamento para 2014 presentado polo equipo de Goberno socialista, nunha votación final na que só os 11 edís do PSOE secundaron o documento, fronte ao voto contrario de PP, BNG e Democracia Ourensá. Unha xunta de Goberno local, integrada por edís socialistas, dará a súa aprobación inicial posiblemente nesta mesma semana.

Nunha sesión extraordinaria de dúas horas e media, a Corporación municipal debateu e votou emenda a emenda, antes da votación definitiva do orzamento no seu conxunto. O alcalde, Agustín Fernández, interveu para criticar as formulacións das emendas e sinalar que en sentido estrito “nin sequera son admisibles como tales” e leu a normativa que indica que non se pode expor un aumento de gastos se non se propón unha baixa igual en contías concretas.

Fernández detallou algunhas das presentadas por PP e BNG, todas rexeitadas nas votacións individuais, salvo unha do PP sobre publicación na páxina de internet das bases de licitación.

O portavoz do BNG, Xosé Somoza, nunha das súas intervencións, aludiu ao proxecto inicial de orzamento como “programa electoral do PSOE” e lembrou que nos dez meses que quedan de goberno local, “éntrase no que os saxóns chaman o tempo do lixo” e que o Goberno de Ourense “perdeu a súa credibilidade hai dous anos e dous meses”, tras a saída do bipartito dos edís nacionalistas.

Somoza criticou a falta “de conexión coa realidade” do PSOE e a carencia no documento orzamentario dunha “visión de conxunto, de modelo de cidade” e achacou ao grupo socialista “que cada un tira para a súa concellaría e non hai nin un só proxecto que implique a varias”.

O PP incidiu nas “ilegalidades” do documento desde o inicio da sesión e en todas as intervencións, pois, segundo os portavoces Rosendo Fernández e Beatriz Tejada, non se poderá cumprir “o compromiso de pago con Sogama, pois non hai partida para o incremento do canon, e falta a negociación obrigatoria no capítulo de gastos de persoal” polo que consideraron o orzamento “extemporáneo e insumiso”, e “unha vergoña”.