A mancomunidade de Ferrol inicia unha nova edición do programa territorio de emprego 2014-2015

O alcalde de Ferrol, Jose Manuel Rey Varela, presidiu esta mañá una nova sesión ordinaria da Mancomunidade de Concellos da Comarca de Ferrol na que se abordou a posta en marcha dunha nova edición do programa “Territorio de Emprego”. Outros asuntos abordados na reunión de hoxe foi o plan de promoción turística do xeodestino Ferrolterra e o regulamento de funcionamento do servizo mancomunado de lacería e refuxio de Mougá. Ademais, deuse conta da solicitude presentada á convocatoria de axudas dos programas de cooperación da Administración autonómica, que teñen como finalidade o fomento do emprego e mellora da empregabilidade no ámbito de colaboración coas entidades locais.

Así as cousas, os alcaldes de Mancomunidade abordaron a continuidade da iniciativa “Territorio de Emprego”, para o curso 2014-2015. Esta iniciativa ten un presuposto total de 73.621,58 euros, dos cales a Consellería de Traballo e Benestar da Xunta de Galicia aporta 64.787 euros dentro da liña de axudas de programas integrados para o emprego. Na primeira edición de Territorio de Emprego participaron 62 demandantes de emprego e se conseguiron 27 insercións laborais. Ao abeiro desta iniciativa, a Mancomunidade organizou diferentes cursos que sumaron máis de 300 horas de formación nas especialidades de: auxiliar de almacén, manipulador de alimentos, servizos básicos de hostalería, iniciación á informática e alerxias e intolerancias alimentarias.

Por outra banda, os rexedores do organismo supramunicipal tamén trataron o Plan de promoción turística de Ferrolterra, que se enmarca dentro do programa FEDER Galicia e está cofinanciado polo Fondo Europeo de Desenvolvemento Rexional. Este plan promocional do xeodestino, se realiza a través do convenio de colaboración entre a Xunta e o organismo supramunicipal, e os eixos fundamentais da difusión son: turismo industrial e artesanal – gastronómico (naval, pan de neda, pementos do couto, conserveiras…), camiños de peregrinación (San Andrés e Camiño Inglés), a costa activa (praias, surf, deportes náuticos, paisaxes…) e as fragas do Eume e espazos naturais de interior.

Plan de cooperación para o emprego

Noutra orden de cousas, os rexedores tamén avanzaron sobre a proposta do regulamento de funcionamento do servizo mancomunado de lacería e refuxio de Mougá. E, por último na reunión desta mañá deuse conta da solicitude presentada á convocatoria de axudas da Consellería de Traballo e Benestar para o fomento do emprego e mellora da empregabilidade no ámbito de colaboración coas entidades locais. A Mancomunidade solicita a administración galega axuda para a contratación dun educador/a social para os programas e iniciativas que desenvolve esta entidade no ámbito da diversidade funcional –como as xornadas de deporte adaptado e inclusivo- e un técnico medioambiental.