A Deputación da Coruña financia a adquisicón dun vehículo adaptado para AFAL de Ferrolterra

O presidente da Deputación da Coruña, Diego Calvo, asinou esta mañá coa presidenta da Asociación de Familiares de Enfermos de Alzhéimer e outras demencias (AFAL-Ferrolterra) un convenio polo que se achegan 45.000 euros a través da adquisición dun vehículo de transporte adaptado.

Este coche, cuxo custo financia en solitario a Deputación, sumarase aos outros dous dos que xa dispón a asociación para o traslado dos seus usuarios e usuarias ao Centro de Día que teñen en Ferrol. Deste modo, coa compra deste novo vehículo, a entidade poderá dar un mellor servizo ás persoas beneficiarias non só da cidade, senón de concellos da contorna como Cabanas, Fene, Mugardos, Neda ou Valdoviño entre outros, ademais de chegar a áreas máis afastadas de Ferrol como Covas, Esmelle ou San Xurxo.   

“Agradecemos esta contribución da institución provincial porque nos permitirá ofrecer este servizo de forma satisfactoria”, declarou a presidenta, Milagros Prieto Gondell, durante a sinatura do acordo na sede da Deputación. “Porque ademais de atender os enfermos, queremos aliviar as cargas que teñen os seus familiares”, engadiu.

Pola súa banda, Diego Calvo, destacou o “encomiable” labor desta asociación, que atende a unhas 80 persoas dos arredores de Ferrolterra. “Nesta liña de actuación, de traballar para os demais, sempre nos atoparedes ao voso lado”, indicou o titular provincial.