Tui recibiu máis de 4700 turistas en tan só un mes e medio

Desde o remate da Semana Santa a Oficina Municipal de Turismo de Tui recibiu un total de 4.724 visitantes segundo os datos fornecidos polo técnico de turismo da Oficina Municipal, quen se incorporou coma bolseiro da Deputación de Pontevedra á cabeza do servizo de atención turística de Tui.

Dos mais de 4.700 visitantes que recibiu a cidade no último mes e medio, 1.700 foron turistas estranxeiros, encabezados polo chegados de Portugal, Alemaña, Italia e Francia. No que se refire aos turistas nacionais, a meirande parte proviñeron de Galicia, sendo os turistas de Madrid, Castela e León e Comunidade Valenciana os de maior afluencia de fóra da comunidade galega. Os datos recollidos pola Oficina Municipal de Turismo de Tui amosan así unha media de 104 turistas por día.

No que se refire aos peregrinos que parten ou pasan pola cidade como porta do camiño portugués a Santiago, estes sumaron un total de 1.654, dos cales, 1200 procederon de países estranxeiros coma Alemaña, Austria, Australia, Brasil, Polonia,Países Baixos, Rusia, Canadá ou Corea do Sur. Contabilízase polo tanto unha media de 36 peregrinos por día, razón pola que o camiño portugués segue ocupando o posto número dous na lista de camiños elixidos para chegar a Santiago, só por detrás do Camiño Francés.

Dada a afluencia tanto de turistas coma de peregrinos, a Oficina Municipal de Turismo de Tui, situada na Praza de San Fernando, permanece aberta de martes a domingo de 11h a 14h e de 16h a 19h.