Traballo investirá preto de 187.000 euros nun obradoiro de emprego en Cangas

A Consellería de Traballo e Benestar vén de aprobar un obradoiro de emprego solicitado polo Concello de Cangas.

Neste programa mixto de formación e emprego se investirán preto de 187.000 euros para formar e ofrecer un posto de traballo a 21 persoas desempregadas nas especialidades de atención sociosanitaria a persoas no domicilio e instalación e mantemento de xardíns e zonas verdes

Os obradoiros de emprego contan con numerosas vantaxes. En primeiro lugar, a posibilidade de acceder a un posto de traballo. Así mesmo, ofrece unha formación teórica e práctica de calidade, orientada ás necesidades reais do mercado laboral e vinculada á obtención dun certificado de profesionalidade de validez nacional que contribúe á mellora da súa empregabilidade. Con todo, este tipo de iniciativas abren un importante espazo de colaboración cos concellos no marco da aposta da Xunta pola eficiencia e optimización de recursos, co obxectivo de orientar adecuadamente os esforzos. Ademais, os obradoiros están vinculados á realización de obras e servizos de interese para a comunidade.

Área territorial de Vigo

Nos próximos meses poranse en marcha un total de 53 obradoiros por toda Galicia, que contarán cun investimento de máis de 10,2 millóns de euros e beneficiarán a preto de 1.300 persoas.

En concreto, na área territorial de Vigo se desenvolverán cinco obradoiros de emprego máis a maiores do concedido ao Concello de Cangas que contarán cun orzamento de preto de 1,1 millón de euros para beneficiar a máis de 120 alumnos.