Técnicos da UCGAL visitan os establecementos hostaleiros de Cangas

A concellería de Comercio e Consumo anuncia que durante estes días técnicos da Unión de Consumidores de Galicia (UCGAL) están visitando diferentes establecementos hostaleiros do Concello de Cangas para informar de maneira personalizada da introdución da figura da Arbitraxe de Consumo no sector turístico, como opción para a solución das controversias xurdidas entre usuarios e empresarios ou profesionais do sector.

A Arbitraxe de Consumo no sector turístico é unha das novidades recollidas no Decreto 148/2013 do 12 de setembro, polo que se regulan o libro de visitas da inspección turística e as follas de reclamación de turismo.

Esta fórmula de resolución extraxudicial de conflitos, que leva funcionando en Galicia desde 1996 e que conta con máis de 10.000 establecementos adheridos, incorpórase agora ao sector turístico permitindo que empresas e profesionais aporten un novo elemento de calidade ao servizo que prestan aos seus clientes.

Coa finalidade de dar a coñecer este novo sistema entre os establecementos e empresas de toda a comunidade, a UCGAL en colaboración doa Axencia de Turismo de Galicia están levando a cabo unha campaña informativa e de adhesión ao Sistema Arbitral de Consumo por distintas vilas e cidades.

A concelleira de Consumo Berta Pérez sinala que esta nova medida permitirá mellorar a calidade dos servizos prestados polos establecementos do municipio.