Soutomaior premia aos seus novos escritores

Entrega de premios aos gañadores

Con motivo do Día das Letras Galegas, a Concellaría de Xuventude do Concello de Soutomaior organizou o seu concurso literario “Verbas para…comunicar”. Un certame que este ano alcanzou a súa sétima edición e que reuniu este mañá a todos os seus participantes para a entrega de premios nos colexios Padín Truiteiro e Santiago Apostol. A edil de Xuventude, Noelia Ocampo, foi a encargada de entregar os galardóns aos doce mozos que se impuxeron nas dúas categorías do concurso.

“Verbas para…comunicar” pretende potenciar o uso da lingua galega, o seu gran valor literario e reafirmar a súa expresión como lingua próxima, útil e moderna entre a mocidade. Mediante a redacción dun texto breve, de carácter persoal, os 175 participantes do certame expresaron as súas opinións e sentimentos, unha mensaxe feita para compartir cos demais a súa visión do mundo actual.

A edil Noelia Ocampo agradeceu a todos os mozos a súa participación e o seu apoio nun concurso que “pretende favorecer a participación da mocidade na creación de textos orixinais co obxectivo de normalizar e fomentar o uso da lingua galega entre este colectivo, fóra de contextos formais e rompendo posibles estereotipos”.

Durante o acto de entrega de premios procedeuse á lectura das composicións premiadas e a continuación realizouse un sorteo entre todos os participantes dun Dicionario da Real Academia da Lingua Galega ademais de obsequiar a todos os asistentes cun pequeno recordo.

Os premiados foron, na categoría de 12 a 14 anos, Miguel Fonterosa, Sara Buceta Díaz e Carla María CorugeiraVeiga, do PadínTruiteiro. Por parte do Colexio Santiago Apóstolo, lles vencedores foron Noelia Carreira Pérez, Antonio Muíños Lorenzo e Iria Custodio Fabre. Leste mesmo centro acaparou todos os galardóns da categoría de 15 a 18 anos na que se impuxeron Carla Gómez Magallanes, Sara Barreiro Rúa, Lucía Alonso González, Araceli Acuña Amil, Carmen García Obelleiro e Antía Igrexas Rodríguez. As composicións premiadas estarán dispoñibles na web do Concello de Soutomaior www.soutomaior.com/xuventude, no apartado de concursos.