Socialistas e populares aproban no pleno de Vigo outra amortización de crédito por 11 millóns de euros

Os grupos municipais do PSOE e o PP en Vigo volveron sumar os seus votos nun pleno para aprobar unha amortización anticipada de crédito, esta vez de 11 millóns de euros, que supón o pagamento adiantado do que queda dun empréstito de 2013 e dunha anualidade dun de 2010.

A tenente de alcalde e presidenta do pleno (en ausencia de Abel Caballero), Carmela Silva, defendeu esta modificación presupostaria, que se pode realizar, segundo recordou, grazas á “extraordinaria xestión económica” do goberno municipal, que segue traballando para conseguir ‘débeda cero’.

Así mesmo, Silva subliñou que o diñeiro que se aforre en intereses o Concello se destinará a políticas sociais e de emprego, e lamentou que o BNG non apoie esta iniciativa. “Vostedes volven votar en contra de Vigo, xa levan demasiado tempo facéndoo”, denunciou.

O edil do PP Miguel Fidalgo sinalou que, malia que o seu grupo apoia esta amortización de crédito, “non se pode enganar os vigueses” dicindo que Vigo é o concello menos endebedado de España, porque segue debendo uns 60 millóns de euros.

O pleno do Concello olívico xa aprobou en 2013 unha amortización de crédito (grazas á abstención do PP) por máis de 16 millóns de euros. O grupo popular tamén apoiou o goberno local nunha modificación presupostaria para destinar 363.000 euros de axudas á aerolínea Volotea.

POLÍTICAS “CONTRADITORIAS”

Pola súa banda, a voceira do BNG, Iolanda Veloso, xustificou o voto negativo a esta proposta que, ao seu xuízo, non supón máis que “dar liquidez aos bancos”. “Se tanto aforramos, esperemos que realmente se reflicta no gasto social, porque ata agora non foi así, senón todo o contrario”, apuntou.

Ademais, Veloso acusou ao goberno municipal de practicar “políticas contraditorias” por pedir no pleno que se apoie unha amortización de crédito, cando o pasado venres, en Xunta de Goberno, aprobouse a petición dun crédito de 6,8 millóns “para obras de humanización”.