Sete galegos disputarán o Campionato de Europa de maratón en Eslovaquia

Sete galegos competirán este fin de semana no Campionato de Europa de maratón que se disputará en Piestany (Eslovaquia). Iván Alonso, Manuel Garrido, Óscar Graña, Ramón Ferro, todos eles do Kaiak Tudense, David Mosquera (Ría de Betanzos), Damián Gónzález (Verducido) e Jacobo Domínguez (Breogán do Grove) serán os representantes de Galicia nunha das competicións máis importantes da tempada.

Os padexeiros do Kaiak Tudense parten como favoritos. O catro posúen unha ampla traxectoria e ademais defenderán varios dos títulos logrados o ano pasado en Vilaverde (Portugal). Iván Alonso competirá en K-1 e K-2, nesta modalidade xunto a Emilio Merchán, en buscar de reeditar a medalla de ouro. O mesmo ocorrerá con Ramón Ferro e Óscar Graña en C-2, os actuais campións continentais.

Manuel Garrido, en C-1, parte tamén con opcións de lograr o triunfo. O ano pasado foi segundo, pero nesta ocasión non terá como adversario a Ton Campos, ausente da competición e que lle superou en Portugal. Garrido preparou especialmente esta cita e ademais mantivo sempre unha gran regularidade nas súas citas internacionais. Sempre estivo entre o tres primeiros. David Mosquera será o outro galego que participe en C-1.

Jacobo Domínguez será outro dos padexeiros que participen en dúas probas. Competirá en C-1 sub-23 e tamén no C-2 sénior, nesta especialidade xunto ao balear Adán Avila. Pola súa banda, Damián González será o representante galego en C-1 júnior.

O Campionato de Europa de Maratón disputarase entre o venres e o domingo. Para a primeira xornada están previstas as regatas de júnior e sub-23. O sábado disputaranse as de C-1 e K-1, deixando para o domingo as de barcos dobres. Como é tradicional, as probas da categoría sénior terán un percorrido aproximado de trinta quilómetros, con sete porteos.