Sanidade actuará en Lugo se a folga na recollida de lixo compromete a saúde dos cidadáns

A Consellería de Sanidade procederá a actuar “como corresponde” se se ve comprometida a saúde dos cidadáns con motivo da folga dos traballadores do servizo de recollida de lixo e limpeza en Lugo.

Así o manifestou, a preguntas dos medios, o director xeral de Asistencia Sanitaria do Sergas, Félix Rubial, quen precisou, no entanto, que é un aspecto que non corresponde directamente ao ámbito da súa competencia.

“Estou seguro de que, en calquera caso, sempre que haxa compromiso para a saúde dos cidadáns, a Consellería ten a obrigación e, por tanto, vai proceder a actuar como corresponde”, sostivo Rubial.

A folga dos traballadores de Urbaser, a concesionaria do servizo de recollida de lixo de Lugo, cumpre este luns a súa sétima xornada de paro indefinido.