Reyes Leis considera lóxico que Hernández non conte co equipo que Currás deseñara

O tenente de alcalde do Concello de Santiago, Reyes Leis, asegurou sentirse “avalada e apoiada” polo futuro alcalde da cidade, o actual conselleiro de Medio, Agustín Hernández, para formar parte do seu futuro goberno e considerou “lóxico” que este non conte co equipo deseñado polo actual rexedor, Ángel Currás, tras a dimisión dos sete edís inhabilitados e Rebeca Domínguez.

“Ata que se saiba que cál é o novo equipo isto -se non ten en conta aos nomes que figuraban na lista de Currás, como o exárbitro Raúl García de Loza – non se sabe, pero tería a súa lóxica que isto fose así”, manifestou este venres ao ser preguntada polos medios de comunicación ao respecto.

Así mesmo, tras evitar pronunciarse sobre as declaracións de Feijóo nas que delegou en Currás a súa decisión de abandonar a acta de edil, Reyes Leis cualificou de “sensato” que o actual rexedor de Compostela abandone a presidencia do Partido Popular de Santiago agora que “non vai ser alcalde”.

“É o lóxico e, ademais, xa se tiñan que convocar eleccións no partido de cara aos próximos comicios municipais” que terán lugar en 2015, expresou.

POSICIÓN DO BNG E PSOE

Ao respecto, o voceiro do grupo municipal socialista, Francisco Reyes, considerou “algo atípico” que o actual alcalde Ángel Currás non deixase a acta de edil tras a toma de posesión de Agustín Hernández como rexedor da capital galega.

“Parécenos algo atípico un goberno no que poidan coincidir un alcalde e un exalcalde, pero a decisión de deixar ou non a concellaría é persoal”, apuntou este venres en rolda de prensa.

“DEDOCRACIA”

O voceiro do BNG local, Rubén Cela, destacou que a elección do actual conselleiro de Medio Ambiente, Territorio e Infraestruturas, Agustín Hernández, como próximo candidato a estes comicios reflicte que “o sistema da dedocracia está profundamente asentado no Partido Popular”.

“Que Feijóo decida nominalmente o candidato é un problema do Partido Popular, agora ben, que Hernández poida designar nominalmente a dedo aos membros desta corporación é un problema de todos”, lamentou o voceiro nacionalista.

Con todo, sobre esta cuestión, considerou que, “de confirmarse” que unha das incorporacións ao goberno municipal será a da deputada no Congreso Marta González esta “sería unha boa noticia”, xa que “formaba parte da candidatura do PP” – ocupaba o número 24 da lista – e “ten todo o aval democrático das papeletas que os veciños depositaron nas urnas”.