Quintana asegura que os simulacros no mar permiten mellorar a eficacia na resposta ante catástrofes mariñas

Rosa Quintana no simulacro en Vilagarcía

A conselleira do Medio Rural e do Mar, Rosa Quintana, supervisou esta mañá nas proximidades do porto de Vilagarcía de Arousa e a praia da Compostela o desenvolvemento dun simulacro de actuación ante un episodio de contaminación mariña. A conselleira destacou que este tipo de exercicios permiten mellorar a axilidade e eficacia na resposta ante calquera tipo de catástrofe de contaminación mariña, poñendo en práctica e sacando o máximo partido aos medios humanos e materiais dispoñibles.

Rosa Quintana, que estivo acompañada polo subdirector xeral do Servizo de Gardacostas de Galicia, Lino Sexto, salientou que é preciso realizar este tipo de exercicios para mellorar a coordinación das distintas unidades participantes e dos medios de resposta. Así, engadiu, compróbase o grao de coñecemento das funcións e cometidos dos participantes no Plan e verifícase a capacidade de despregue e os tempos de resposta das diferentes unidades.

Desenvolvemento do exercicio
O operativo comezou cun suposto caso de embarrancamento dun buque durante a recalada no porto de Vilagarcía, provocando o derrame dunhas 500 toneladas de combustible. Dada a gravidade do accidente, o Ministerio de Fomento activa o Plan Marítimo Nacional e a Xunta o Plan Territorial de Continxencias de Contaminación Mariña Accidental (CAMGAL) na situación de emerxencia 2, conforme o Sistema Nacional de Resposta. Ao mesmo tempo actívase o Plan Interior Marítimo do Porto de Vilagarcía e os distintos plans locais dos municipios costeiros afectados da ría.

A continuación, detéctase a chegada de contaminación a distintos puntos de costa da ría, polo que a Xunta considera preciso mobilizar os medios do Plan Estatal de la Ribera del Mar, a cargo do MAGRAMA. Tras comprobar que unha parte da mancha de fuel se separou da mancha principal e que esta se dirixe ata a praia de Compostela e ameaza con chegar a Cortegada, a Xunta decide establecer unha zona de sacrificio da praia tendendo unha barreira cilíndrica e selladora coa intención de que a mancha quede contida na praia, onde se procede á súa recollida manual. Para esta actuación mobilizáronse numerosos medios materiais e humanos da Xunta, de Salvamento Marítimo (SASEMAR), do concello de Vilagarcía e do Estado.