Os socialistas composteláns denuncian a ingobernabilidade da cidade

O voceiro do PSOE no Concello de Santiago, Paco Reyes, denunciou este mércores unha vez máis a situación “caótica” e de “ingobernabilidade” da capital galega, ao tempo que recriminou o alcalde, Ángel Currás, que estea “xordo e mudo” para a oposición.

En rolda de prensa, o edil socialista criticou así que o rexedor nin “chamara” aos grupos da oposición nin convocara a xunta de voceiros para informar sobre a dimisión de nove dos 13 concelleiros do PP na última semana.

“O único que sabemos é que a capital de Galicia está sen goberno ‘sine die’ e todo o resto de informacións que temos veñen dos medios de comunicación”, censurou.

Por iso, á vista de que o rexedor non quere abordar coa oposición “a profunda crise” que atravesa a casa do concello, aproveitou a presenza dos xornalistas para trasladar unha serie de cuestións o primeiro edil compostelano.

Así, interesouse por coñecer por que Currás e o seu primeiro tenente de alcalde, Reyes Leis, concentran todas as competencias dos edís dimitidos e “qué papel” xogarán os outros dous concelleiros do PP na casa do concello. Así mesmo, preguntou ao rexedor se non cre que “ten algunha responsabilidade” na situación do Pazo de Raxoi.

“ROTUNDO FRACASO”

Dito isto, puxo en valor que, malia o “desgoberno” que atravesa o Concello de Santiago, os servizos públicos “seguen funcionando” grazas á “abnegación” dos funcionarios. “Porque o Goberno do PP é un rotundo fracaso”, sostivo.

A maiores, Paco Reis utilizou o exemplo da capital galega para desmentir que “o PP e o PSOE son o mesmo”, pois “nunca” en 28 anos de goberno socialista en solitario e en coalición co BNG “se deu unha situación semellante”.