Os maiores e pensionistas de Ourense poderán obter ou renovar unha Tarxeta Milenio acreditando ingresos inferiores ao 150% do IPREM

O vindeiro martes, día 1 de xullo, entrará en vigor a nova normativa reguladora das Tarxetas Milenio para a terceira idade e pensionistas, aprobada polo Pleno do Concello, polo que só se expedirán tarxetas para viaxar gratuitamente no servizo de autobuses urbanos ás persoas solicitantes cuxos ingresos sexa inferiores ao 150% do Indicador Público de Renta de Efectos Múltiples (IPREM).

Con esta medida, o Concello dá aplicación ao acordo probado polo Pleno do Concello que decidiu modificar o réxime das tarxetas de uso gratuíto dos autobuses municipais en dos termos: establecer a gratuidade para tódalas persoas desempregadas e condicionar a dos pensionistas e terceira idade aos ingresos económicos.

“Son dúas medidas de xustiza social”, sinala a concelleira de Transporte Susana Bayo, quen asegura que a finalidade é “axudar ás persoas que máis o necesiten, como poden ser nestes momentos as persoas que se atopan sen emprego, e tamén ás persoas maiores con menos recursos económicos”. O acordo plenario foi aprobado por unanimidade dos grupos políticos municipais a proposta dunha moción presentada polo grupo do BNG.

Certificado de ingresos

Así, a partir do vindeiro martes, 1 de xullo, as persoas que desexen obter unha Tarxeta Milenio das modalidades Terceira Idade ou Pensionista (ou renovar a que teñan en caso de caducidade) deberán achegarse ao Concello, e presentar por Rexistro un escrito (que poden obter no Concello ou a través da web) no que autorice aos técnicos municipais a recabar datos tributarios para constatar se os seus ingresos superan o 150% IPREM.

Unha vez feita esta comprobación, os técnicos expedirán un certificado e chamarán por teléfono á persoa solicitante para comunicarlle que pode recoller o documento no Concello ou recibilo por correo.

Tamén solicitarán no Concello o certificado acreditativo de que a persoa leva empadroada en Ourense cunha antigüidade mínima de 6 meses.

Con estes documentos, copia do DNI e fotografía, (máis documento expedido pola entidade ou organismo pagador que acredite a condición de pensionista ou xubilado, de ser o caso), a persoa solicitante acudirá ás oficinas de Novagalicia Banco, para solicitar a tarxeta.

Esta medida afectará ás novas tarxetas e a renovación daquelas que vaian caducando, xa que as actualmente vixentes seguirán sendo válidas ata que remate a súa vixencia.

As persoas que alcancen ou superen o nivel de ingresos definido (150% do IPREM) non obterán tarxetas Milenio para viaxar gratuitamente nos autobuses urbanos pero, como as demais persoas, poderán solicitar as Tarxetas Milenio ordinarias (0,62 euros por viaxe).